تۇركيادا تۇراتىن ەتنيكالىق قازاقتار جەرگىلىكتى حالىقتىڭ نە سەبەپتى قىمىزعا قارسى ەكەنىن ايتتى
ەرلى- زايىپتى شەريزات دوعرۋ مەن گۇلنار ءسالىمجان قىزى «يزميردە قىمىز اشىتاتىن قازاقتار» رەتىندە شەتتەگى دياسپوراعا ءبىرشاما تانىلعان كاسىپكەرلەر. ازاتتىققا گۇلنار ءسالىمجان قىزى تۇركيادان قالاي جەر الىپ، بيزنەس اشقاندارى تۋرالى اڭگىمەلەپ بەردى.
ازاتتىق: - قىمىز شارۋاشىلىعىمەن اينالىسىپ كەلە جاتقاندارىڭىزعا قانشا ۋاقىت بولدى؟
گۇلنار ءسالىمجان قىزى: - تۇركياعا 1993 -جىلى كوشىپ كەلدىم. وڭتۇستىك قازاقستان وبلىسىنىڭ سارى اعاش اۋدانىندا تۋىپ وسكەنمىن. جۇبايىم شەريزات دوعرۋ - تۇركيالىق قازاق، تۇرىك حالقىنىڭ ورتاق اسى رەتىندە قىمىز ءوندىرۋ ماقساتىندا فيرما قۇرىپ 1985 -جىلدان باستاپ جۇمىس ىستەي باستاپتى. جەر الىپ، فيرماسىنىڭ قۇجاتتارىن رەتتەپ، مال جيناعانشا بىرنەشە جىل وتكەن. تازا قىمىز وندىرۋمەن اينالىسقانىنا ءبىر جىلداي عانا بولعان ەكەن. ءبىراق بۇل جاقتاعى قازاقتاردىڭ قىمىز باپتاۋعا يكەمدەرى بولماعان. جۇمىستارى دۇرىس جۇرمەپتى. 1990-جىلداردىڭ باسىندا قازاقستانعا بارىپ، مەنىمەن تانىسىپ، وتاۋ قۇردىق.
ازاتتىق: - قىمىز وندىرۋمەن تىكەلەي وزدەرىڭىز اينالىساسىزدار ما، الدە جۇمىسشى ۇستايسىزدار ما؟
گۇلنار ءسالىمجان قىزى: - تىكەلەي ءوزىمىز اينالىسامىز. قازىر قولدا 60 قا جۋىق جىلقى بار. ءبىراق سونىڭ 20 عا جۋىعىن عانا ساۋامىز. ويتكەنى جەرگىلىكتى حالىق جىلقى ونىمىنە قارسى. سول سەبەپتى ساۋعان قىمىزىمىز باسىندا وتپەيتىن. قازىر جارنامالاي-جارنامالاي بىرتىندەپ ۇيرەتىپ كەلەمىز. وسى كۇندە تاپسىرىس كوبەيىپ، قىمىز جەتپەي قالاتىن بولىپ ءجۇر.
ازاتتىق: - قىمىز ساتۋ ءىسىن قالاي ۇيىمداستىراسىزدار؟
گۇلنار ءسالىمجان قىزى: - ءبىزدىڭ وتىرعان جەرىمىز دەمالىس ايماعى ىسپەتتى، تۋريستەر، دەمالۋشىلار ءجيى كەلەدى. قىمىز تەز بۇزىلىپ كەتپەس ءۇشىن شاعىن قۇتىلارعا قۇيىپ ساقتايمىز. كەيدە ەم ءۇشىن ىزدەگەندەر ينتەرنەت ارقىلى تاپسىرىس بەرەدى.
ازاتتىق: - تۇركيادا جايىلىم ماسەلەسىن قالاي شەشتىڭىزدەر؟
گۇلنار ءسالىمجان قىزى: - ءبىز تۇراتىن جەر يزميردەن 35 شاقىرىم قاشىقتا، پاشا كەمال اۋدانىنا قارايدى. بۇرىن جەكە اۋىل بولعان ەكەن. ءبىراق بەلگىسىز سەبەپتەرمەن جەردەگى سۋ تارتىلىپ، اۋىل كوشىپ كەتىپتى. يەن قالعان اۋىل ەكەن. سول اۋىلدان جولداسىم 35 گەكتار جەردى ساتىپ الدى. ول جەردە سۋ دا، جول دا، ءتىپتى ەلەكتر جارىعى دا جوق بولدى. سونىڭ ءبارىن جولداسىم ءوز قولىمەن جاسادى. 80 مەتر تەرەڭنەن سۋ شىعاردىق. العاش شارۋاشىلىقتى جۇرگىزە باستاعان كەزدە 400 باس قويىمىز بولعان. قۇرت-ىرىمشىك وندىرەتىنبىز. ءبىراق جايىلىمنىڭ ازدىعىنا بايلانىستى قويدى ازايتىپ، ءبىرىڭعاي جىلقىمەن قالدىق. قازىر شالىمىز ەكەۋىمىز عانا تۇرامىز.
ازاتتىق: - تۇركيادا شەتەلدىكتەرگە جەر ساتۋ نەمەسە جالعا بەرۋ ماسەلەسى قالاي جۇزەگە اسادى؟
گۇلنار ءسالىمجان قىزى: - شەتەلدىكتەرگە جەر ساتىلادى. زاڭدا رۇقسات بەرىلگەن. ماسەلەن، ءبىزدىڭ اينالامىزدا جەر الىپ، كاسىپتەرىن جۇرگىزىپ جاتقان اعىلشىندار، گەرمانيالىق ادامدار بار. ءتىپتى جاقىندا قازاقستاننان كەلگەن بىرنەشە ازاماتتىڭ جەر ساتىپ العانىن ەستىدىم. ءبىراق ءوزىم كورمەدىم.
