الەم ەلدەرىندەگى شاش كۇتىمى
اعىلشىندىق ءتاسىل. تۇماندى البيون تۇرعىندارىنىڭ ايەلدەر قاۋىمى شاشتارىن اسەمدەۋ ءۇشىن تاۋىق جۇمىرتقالارى مەن بالدى قولدانادى. 2 جۇمىرتقانىڭ سارى جانە اق ۋىزدارىن ءبىر-بىرىنەن اجىراتىپ العان ءجون، سەبەبى، جۇمىرتقانىڭ اق ۋىزى شاشتى باستاستىرىپ تاستايدى. 2 سارى ۋىزدى 1 اس قاسىق بالمەن ارالاستىرىڭىز. قوسپانى دىمقىل شاشقا جاعىپ، بىرنەشە مينۋتتان سوڭ، جاقسىلاپ جۋىپ تاستاڭىز.
جاپوندىق ءتاسىل. شىعىس ايەلدەرى شاش كۇتىمىنە ۇلكەن اجەلەرىنەن قالعان ءداستۇرلى ءادىس - كۇرىشتى كوپ پايدالانادى. كۇرىش داندەرىنەن جاسالعان ماسكالار شاشتىڭ بارلىق تۇرىنە جارايدى، شاشتىڭ جىلتىر بولۋىنا جانە قايىزعاقتان ساقتايتىن ەمدىك قاسيەتى بار. 2 اس قاسىق كۇرىش اراعىنا (ساكە) 1 ليمون شىرىنىن، 1 اس قاسىق بال قوسىپ ارالاستىرادى. قوسپانى 15-20 مينۋتقا باسقا جاعىپ، ارتىنان مۇقيات جۋىپ تاستاۋ كەرەك. جاپون ايەلدەرى بادام مايىن قاتتى باعالايدى. ونى ۇيلەرىندە باعالى زات رەتىندە قىمبات فارفور ىدىستارىندا ساقتايدى ەكەن. كۇنشىعىس ەلىنىڭ ايەلدەرى تەڭىز تۇزىمەن ارالاسقان بادام مايىن ادەمىلىكتىڭ سيقىرلى سۋى دەپ باعالاعان. 1 شاي قاسىق تەڭىز تۇزىن 1 ستاقان مينەرالدى سۋعا ەزىپ، 1 اس قاسىق بادام مايىن قوسىپ جاقسىلاپ ارالاستىرادى دا، باس تەرىسىنە جاعىپ، 10 مينۋتتان سوڭ، جۋىپ تاستايدى.
بولگارلار ءتاسىلى. شاشقا جاعىمدى حوش يىستەر بەرۋ ءۇشىن، بولگارلىق ايەلدەر ەرتە زاماننان بەرى راۋشان گۇلدەرىنىڭ كۇلتەرلەرىنەن دايىندالعان تۇنبانى قولدانعان. ونىڭ دايىندالۋى وڭاي. گۇلدەر سولا باستاعاندا، ونىڭ كۇلتەرىن ابايلاپ تەرىپ الىڭىز دا، ۇستىنەن سۋىق سۋ قۇيىپ، قاراڭعى جەرگە قوي، ەكى كۇن تۇرۋ كەرەك. شاشتى تازالاپ جۋىپ العاننان كەيىن وسى تۇنبانى شاشقا بۇركۋ كەرەك. راۋشان گۇلى حوش ءيىستى بولعاندىقتان، باقىت گارمونى - ەندورفيننىڭ ءبولىنىپ شىعۋىنا ىقپال ەتەدى.
