الماتىدا ۇلتتىق سپورت تۇرلەرىن جاڭعىرتۋ قولعا الىنباق - ن. نۇروۆ

الماتى. قازاقپارات - الماتىدا رەسپۋبليكالىق «ۇلى دالا ويىندارى» فەستيۆالى وتەدى.

 بايقاۋدىڭ شارتتارى تۋرالى «سۇڭقار» حالىقارالىق شاڭعى ترامپلينى كەشەنىندە اكىمدىك پەن ۇلتتىق سپورت قاۋىمداستىعى وكىلدەرى ايتتى.

 28 - مامىردا الماتىداعى ورتالىق يپپودرومدا قازاقستان رەسپۋبليكاسى تاۋەلسىزدىگىنىڭ 25 جىلدىعى مەن الماتى قالاسىنىڭ 1000 جىلدىق مەرەيتويلارى قارساڭىندا جانە «سپورتتىق الماتى» باعدارلاماسىن دامىتۋ ماقساتىندا ۇلتتىق سپورت تۇرلەرىنەن رەسپۋبليكالىق «ۇلى دالا ويىندارى» 1- فەستيۆالى وتەدى.

 اتاپ ايتقاندا، ۇلتتىق سپورتتىڭ 8 ءتۇرى بويىنشا: 25 شاقىرىمدىق الامان بايگە، كوكپار سايىسى، اۋدارىسپاق، تەڭگە ءىلۋ، قىز قۋۋ، توعىزقۇمالاق، اسىق اتۋ ويىنى، جامبى اتۋ تۇرلەرىنەن باسەكە ۇيىمداستىرىلسا، وسى مەرەيلى مەرەكەنىڭ كورەرمەندەرى ءىس- شارا بارىسىندا قولىنا قۇس قوندىرعان قۇسبەگىلەردىڭ دە ەركىن قيمىلىن تاماشالاي الادى.

سايىسقا قازاق ەلىنىڭ تۇڭعىش استاناسى اتانعان ورىنبور قالاسىنىڭ، ەكىنشى استاناسى قىزىلوردا قالاسىنىڭ، سونداي- اق، الماتى جانە استانا قالاسىنىڭ قۇراما كوماندالارى، بارلىعى 150 ادام قاتىسادى.

قالالىق دەنە شىنىقتىرۋ جانە سپورت باسقارماسىنىڭ باسشىسى نايل نۇروۆتىڭ ايتۋىنشا، حالىق اراسىندا ۇلتتىق سپورت تۇرلەرىنەن تۋرنيرلەر سيرەك وتكىزىلەدى. قالا اكىمدىگى بۇل ولقىلىقتىڭ ورنىن جويىپ، رەسپۋبليكالىق تۋرنيردى جىل سايىن وتكىزىپ تۇرماق.

 «ۇلى دالا ويىندارى الماتىداعى ۇلتتىق سپورت تۇرلەرىن دامىتۋدىڭ العاشقى قادامى. جاقىندا الماتىدا قازاق كۇرەسىنەن تۋرنير ءوتتى. وتە ۇلكەن قىزىعۋشىلىق بولدى. قالا بيلىگى قازاق سپورت تۇرلەرىن دامىتۋعا، جاڭعىرتۋعا بارىن سالادى»، - دەدى ن. نۇروۆ.

اۆتور: گۇلميرا عوسمانالي