قازاقستان اسكەري ۇشقىشتارى العاش رەت تۇندە جۇكتى ءىلىپ تاسىمالداپ ۇيرەندى - فوتو
بۇل تۋرالى ق ر قورعانىس مينيسترلىگىنىڭ باسپا ءسوز قىزمەتى حابارلادى.
اتالمىش ۇشۋلاردىڭ باستى ماقساتى - «KADEX» قارۋ-جاراق پەن اسكەري-تەحنيكالىق كورمەسىن وتكىزۋگە ەكيپاجداردى دايىنداۋ. تۇنگى مەزگىلدە اۋە كولىگىنە ىلىنگەن جۇكپەن ۇشۋ تۇندە «بەمبي» سۋ اعىزاتىن قۇرىلعىسىمەن ءورت ءسوندىرۋشى ۇشۋ قۇرامىن دايىنداۋعا جاتتىعۋدىڭ باسى.
كۇندىزگىمەن سالىستىرعاندا تۇنگى جاعدايداعى ۇشۋلاردىڭ ءبىرقاتار ەرەكشەلىكتەرى بار. ولاردىڭ ىشىندە جەر بەتىنىڭ كورىنبەۋى، باعدارلاردىڭ ناشار كورىنۋ، جاساندى جارىقتان باعدارلاردىڭ شىن بەينەسىنە سايكەس كەلمەۋى، جارىق بەرەتىن باعدارلارعا دەيىن (ادام كوزى قۇرىلىسىنىڭ فيزيولوگيالىق ەرەكشەلىكتەرىنە بايلانىستى) قاشىقتىقتى كوزبەن مولشەرلەۋدە سايكەسسىزدىكتىڭ پايدا بولۋى، ۇشۋدىڭ ناۆيگاتسيالىق ەلەمەنتتەرىن ايقىنداۋ دالدىگىنىڭ تومەندەۋى جانە كوكجيەك سىزىعىن انىقتاۋدىڭ تومەندەۋى.
سىرتقى ىلمەكتە جۇكپەن ۇشۋ كەزىندە ەلەكتر بەرىلىس توراپتارى، اعاشتار جانە ت. ب. سياقتى جاساندى كەدەرگىلەردى ەسكەرۋ قاجەت. وتكىزىلگەن وقۋ-جاتتىقتىرۋ ۇشۋلارى بارىسىندا ءبىرقاتار ۇشقىش باعا جەتپەس تاجىريبە جيناقتاپ، تۇندە سىرتقى ىلمەكتە جۇكپەن ۇشۋعا رۇقسات الدى.
اتاپ ايتساق، ولار - ۇشقىش-ينسپەكتور پولكوۆنيك داستان بەيسەنبينوۆ، قاۋىپسىزدىك ءبولىمىنىڭ اعا ينسپەكتورى پودپولكوۆنيك ەركىن ناكىشيەۆ، ارميالىق اۆياتسيانىڭ اۆياتسيالىق ەسكادريليا كومانديرى پودپولكوۆنيك ارداق نۇعىمانوۆ.
ۇشۋ قۇرامىنان باسقا مۇنداي ۇشۋلاردى قامتاماسىز ەتۋدە ەسكادريليانىڭ ينجەنەرلىك-اۆياتسيالىق قىزمەتى، اۋەايلاقتىق- تەحنيكالىق قامتاماسىز ەتۋ، پاراشيۋتتىك-دەسانتتىق قىزمەتتىڭ جەكە قۇرامى مول تاجىريبە جيناقتادى.
