دۇنيەجۇزىلىك گۋمانيتارلىق سامميتتە ىستامبۇل دەكلاراتسياسى قابىلدانباق
دەپ حابارلادى www.24.kz.
سوندىقتان بۇكىل الەمنىڭ نازارى وسى ساتتە القالى وتىرىسقا اۋعان. اتاپ ءوتۋ كەرەك، سامميتكە 177 ەلدىڭ وكىلدەرى قاتىسۋدا. ونىڭ 60-قا جۋىعى - مەملەكەت جانە ۇكىمەت جەتەكشىلەرى. جيىنعا قاتىسۋشىلار ب ۇ ۇ- نىڭ كۇن تارتىبىنە ۇسىنعان ادامزات قۇندىلىقتارى، ادامنىڭ قاۋىپسىزدىگى، ار- وجدانى مەن ءوسىپ- ونۋىنە قولايلى مۇمكىندىك جاساۋدىڭ جاي- كۇيىن تالقىلاۋدا. ب ۇ ۇ قازىرگى تاڭدا الەمنىڭ ءار تۇكپىرىندە كەسكىلەسكەن قاقتىعىستار مەن تابيعي اپاتتاردىڭ جيىلەي تۇسكەنىنە ەرەكشە الاڭداپ وتىر. ويتكەنى، توتەنشە جاعداي سالدارىنان بۇگىندە كومەككە ءزارۋ ادامداردىڭ سانى 130 ميلليونعا جەتكەن. ونىڭ 60 ميلليونى بوسقىندار ەكەن. الايدا ب ۇ ۇ- نىڭ باس حاتشىسى پان گي مۋن مۇقتاج جاندارعا كومەك كورسەتۋگە قولداعى مۇمكىندىكتەر شەكتەۋلى بولىپ وتىرعانىن ايتادى. سوندىقتان وسى سامميتتە الەم ەلدەرىنىڭ كوشباسشىلارىنا داعدارىستاردىڭ الدىن الۋ مەن قاقتىعىستاردى توقتاتۋعا ۇندەۋ جاريالانباق.
«مەن بۇل سامميتتى 4 جىل بۇرىن وتكىزۋدى ۇسىنعان ەدىم. وسى ۋاقىت ىشىندە 150 ەلدەن 23 مىڭ اداممەن كەزدەسۋ وتكىزىپ ۇلگىردىك. الەمدەگى كومەككە مۇقتاج جانداردىڭ تاعدىرى ءبىزدى قاتتى الاڭداتادى. وتانىنداعى زورلىق- زومبىلىق سالدارىنان قانشاما ادام ۇيلەرىن تاستاپ، بوسىپ ءجۇر. بۇگىندە بۇل - ەڭ ماڭىزدى ماسەلەلەردىڭ ءبىرى. سوندىقتان سامميتكە الەم جەتەكشىلەرى مەن ءتۇرلى حالىقارالىق ۇيىم وكىلدەرى شاقىرىلدى. ءبارىمىز بىرىگىپ، تۇيتكىلدىڭ ءتۇيىنىن تارقاتاتىنداي ءبىر شەشىم قابىلداۋىمىز كەرەك»، - دەدى ب ۇ ۇ باس حاتشىسى پان گي مۋن.
دۇنيەجۇزىلىك گۋمانيتارلىق سامميتتىڭ رەسمي وتىرىسىنان بولەك، قوعامدىق ۇيىمدار مەن حالىقارالىق قورلاردىڭ قاتىسۋىمەن 20-دان استام ءىس- شارا وتەدى. سامميتتىڭ سوڭىندا ىستامبۇل دەكلاراتسياسى قابىلدانادى دەپ جوسپارلانۋدا.
