قازاقستاندىق ادەمى مەن رەسەيلىك ءانشى سوسو دۋەت بولىپ ءان شىرقادى
بۇل تۋرالى بۇگىن قازاقستاندىق ءانشىنىڭ پروديۋسەرى رومان سامساكوۆ حابارلادى.
ايتا كەتەلىك، Ademi رەسەيدىڭ سوچي قالاسىندا وتكەن «جاڭا تولقىن-2015» بايقاۋىندا ەكىنشى ورىن العان بولاتىن. سونداي-اق، كورەرمەندەر كوزايىمى جۇلدەسىن جەڭىپ الدى.
بۇل بايقاۋ تاريحىندا قازاقستاندىق ورىنداۋشىلار ءۇشىن ەڭ جوعارعى ناتيجە.
سوسو پاۆلياشۆيليمەن بىرلەسە شىعارماشىلىق جۇمىس جاساۋ جونىندە كەلىسسوزدەر ءبىر ايعا جۋىق ۋاقىتقا سوزىلعان.
سونىڭ ناتيجەسىندە س. پاۆلياشۆيلي Ademi-گە ءوزىنىڭ «جۇرەگىمدەگى كوكتەم» كومپوزيتسياسىن دۋەت بولىپ ورىنداۋدى ۇسىنعان. بۇل كومپوزيتسيا ءانشىنىڭ ماسكەۋدەگى دىبىس ستۋدياسىندا جازىلدى.
ەندى الداعى ۋاقىتتا بۇل ءان رەسەي مەن قازاقستاننىڭ راديوستانسالارىندا شىرقالاتىن بولادى. ال الداعى ماۋسىم ايىندا مۋزىكانتتار ماسكەۋدە ءاننىڭ كليپىن ءتۇسىرۋدى جوسپارلاپ وتىر.
Ademi- نىڭ ايتۋىنشا، وعان سوسومەن جۇمىس ىستەگەن وتە ۇنايدى. سوسو كوڭىلگە سەنىم ۇيالاتىپ، جۇمىسقا ىنتالاندىرا بىلەتىن كاسىپقوي ءانشى. بۇدان باسقا، سوسو پاۆلياشۆيلي ادەمىگە ءوزىنىڭ اۆتورلىق ليريكالىق ءانىن سىيعا تارتىپتى. مۇنى ادەمى كوپ ۇزاماي تىڭدارماندارىنىڭ نازارىنا ۇسىناتىن بولادى.
اۆتور: ايبوتا جاپپاربەرگەن
