شىمكەنت: لومباردتا جۇمىس ىستەيتىن ايەلدەر جاساعان ۇرلىقتارىن جاسىرۋ ءۇشىن مەكەمەنى تونادى دەپ حابار بەرگەن

شىمكەنت. قازاقپارات - لومباردتا (جەكە تۇلعالارعا جىلجىمالى مۇلىك كەپىلدىگىمەن قىسقا مەرزىمدى قارىز بەرەتىن مەكەمە) جۇمىس ىستەيتىن ايەلدەر جاساعان ۇرلىقتارىن جاسىرۋ ءۇشىن مەكەمەنى تونادى دەپ حابار بەرگەن.

بۇل تۋرالى و ق و ءى ءى د باسپا ءسوز قىزمەتى حابارلادى.

بەلگىلى بولعانداي، 15 -مامىردا ارىس اۋداندىق پوليتسيا بولىمىنە جەرگىلىكتى لومباردتىڭ تونالعانى جايلى حابار ءتۇستى. جاپا شەگۋشىنىڭ سوزىنە قاراعاندا، تاڭەرتەڭ لومباردقا بەتپەردە كيگەن بەلگىسىز ەر ادام باسا كوكتەپ كىرىپ، قىزمەتكەردى تەمىر زاتپەن ۇرعان. كەيىن سەيفتىڭ كىلتىن الىپ، بارلىق التىندى الىپ، تايىپ تۇرعان. كەلتىرىلگەن شىعىن سوماسى 15,5 ميلليون تەڭگەگە باعالاندى.

اتالعان فاكت بويىنشا پوليتسەيلەر ق ر ق ك 191-بابىنا («توناۋ») سايكەس سوتقا دەيىنگى تەرگەۋ امالدارىن باستادى. ءبىرقاتار ساراپتاما تاعايىندالدى.

الايدا تەرگەۋ شارالارى كەزىندە بۇل جالعان حابار بولعانى انىقتالدى. وسىلايشا ولار ءوز ۇرلىقتارىن جاسىرىپ قالماق بولعان.