ەلوردا كوشەلەرىندە قوعامدىق كولىكتەرگە ارنايى جولاقتار ەنگىزىلەدى

استانا. قازاقپارات - ەلوردا كوشەلەرىندە قوعامدىق كولىكتەرگە ارنايى جولاقتار ەنگىزىلەدى.

بۇل تۋرالى بۇگىن استانا قالالىق جولاۋشىلار كولىگى باسقارماسىنىڭ باستىعى ەدىل سۇلەيمەنوۆ ءمالىم ەتتى.

«قوعامدىق كولىكتەرگە ارنايى جولاق بەلگىلەۋ جوباسى وتكەن جىلى قولعا الىنعان بولاتىن. بۇل جوبا ءوز تيىمدىلىگىن كورسەتىپ وتىر. جۇرگىزىلگەن ساراپتاما جىلجىمالى قوعامدىق كولىك قۇرامىنىڭ جىلدامدىعى 12-15 پايىزعا ارتقانىن كورسەتتى»، - دەدى ە. سۇلەيمەنوۆ.

ونىڭ ايتۋىنشا، وسىعان وراي بۇل جوبانى ودان ءارى جالعاستىرۋ تۋرالى شەشىم قابىلدانعان. ول ءۇش كەزەڭمەن جۇزەگە اسىرىلادى.

«ءبىرىنشى كەزەڭ 5 -ماۋسىمدا قولعا الىنىپ، الاش تاس جولى بويىندا «ماگنۋم» ساۋدا ورتالىعىنان ۋاليحانوۆ كوشەسىنە دەيىن، قورعالجىڭ تاس جولى بويىندا بەيسەكوۆادان تۇران داڭعىلىنا دەيىن ارنايى جولاقتار ەنگىزىلەدى. ەكىنشى كەزەڭ 15 -ماۋسىمىنان باستاپ قولعا الىنىپ، بۇل جوبالار اباي مەن كەنەسارى كوشەلەرىندە ءبىر باعىتتاعى كولىك قوزعالىسى جوباسىمەن بىرگە جۇرگىزىلەدى»، - دەدى ول.

ال ءۇشىنشى كەزەڭدە جەڭىس داڭعىلى بويىندا ەسەنبەرليننەن كەنەسارى كوشەسىنە دەيىن، بارايەۆ بويىندا قورعالجىن تاس جولىنان ۋاليحانوۆ كوشەسىنە دەيىن قوعامدىق كولىكتەرگە ارنايى جولاقتار بولادى.

 اۆتور: مارلان جيەمباي