ولجاس سۇلەيمەنوۆ ازەربايجان پرەزيدەنتىنىڭ قۇرمەت ديپلومىمەن ماراپاتتالدى - فوتو
اتاپ ايتساق، 80 جاسقا تولعان قازاقتىڭ قوعام قايراتكەرى، الەمگە بەلگىلى اقىن، قازاقستاننىڭ ەڭبەك ەرى، جازۋشى ولجاس سۇلەيمەنوۆ، تۇركىتانۋشى عالىم، لومونوسوۆ اتىنداعى م م ۋ ازيا جانە افريكا ەلدەرى ينستيتۋتىنىڭ وكىلى دميتري ناسيلوۆ، كورنەكتى عالىم، قازاقستاننىڭ قوعام قايراتكەرى ءادىل احمەتوۆ پەن وزبەكستان عىلىم اكادەمياسىنىڭ اكادەميگى، تاريحشى عالىم احمادالي اسقاروۆ تۇركى اكادەمياسىنىڭ التىن مەدالدارىن كەۋدەلەرىنە تاقتى.
وسى تۇلعالار ماراپاتتالىپ بىتكەن سوڭ، ازەربايجان رەسپۋبليكاسىنىڭ قازاقستان رەسپۋبليكاسىنداعى توتەنشە جانە وكىلەتتى ەلشىسى راشاد مامەدوۆ ولجاس ومار ۇلىن ساحنا تورىنە قايتا شاقىرىپ، ءازىربايجان پرەزيدەنتىنىڭ قۇتتىقتاۋ حاتى مەن قۇرمەت ديپلومىن تابىستادى.
«2016-جىلدىڭ 18- مامىرىندا قازاقتىڭ ءبىرتۋار ۇلى، تۇركى الەمىنە ورتاق تۇلعا ولجاس سۇلەيمەنوۆ 80 جاسقا تولدى. 16- مامىر كۇنى ازەربايجان پرەزيدەنتى يلحام اليەۆ ازەربايجان رەسپۋبليكاسىنىڭ اتىنان ولجاس سۇلەيمەنوۆتى قۇرمەت ديپلومىمەن ماراپاتتاۋ تۋرالى قاۋلىعا قول قويدى»، - دەدى ەلشى و. سۇلەيمەنوۆتى قۇتتىقتاي وتىرىپ.
«1990-جىلدىڭ 20- قاڭتارىندا باكۋگە كەڭەس اسكەرى كىرىپ، بەيبىت حالىق قازا تاپقان كۇننىڭ ەرتەڭىندە ازەربايجاننىڭ زيالى قاۋىم وكىلدەرى سول كەزدەگى كەڭەس وداعى ەلدەرىندەگى ارىپتەستەرىنە مالىمدەمە جاساپ، بۇكىل الەمگە ازەربايجان حالقىنىڭ ءۇنىن جەتكىزۋ ءۇشىن باكۋگە شاقىرعان ەدى. ەرتەڭىندە باكۋگە جالعىز ادام كەلدى، ول - باكۋ حالقىنىڭ جانىنان تابىلعان ولجاس سۇلەيمەنوۆ ەدى...» ، - دەگەن ەلشى ازەربايجان جۇرتى و. سۇلەيمەنوۆتىڭ ەرلىگى مەن جاناشىرلىعىن ەشقاشان ۇمىتپايتىنىن اتاپ ءوتتى.
