قازاقستاندىق ۇستاز «سويلەي» الاتىن قالام ويلاپ تاپتى

استانا. قازاقپارات - ۇلاعاتتى ۇستاز ءتالىم-تاربيە بەرگەن شاكىرتىنىڭ بولاشاعىنا الاڭدايدى.

ءارقايسىسى ومىردەن ءوز ورنىن اداسپاي تاپسا دەيدى. ول ءۇشىن رۋحاني تاربيە مەن اعارتۋ جۇمىسىنىڭ قاز-قاتار جۇرگەنىن قالايدى.

وسىنداي ۇلاعاتتى ۇستازدىڭ ءبىرى - بۇگىندە جاس ماماندارعا ونەگە كورسەتىپ جۇرگەن بيجان يگەنبايەۆا. بەسىك جىرىن قوڭىر ۇنمەن شىرقاپ تۇرعان بيجان اپايدىڭ قولىنداعى قالامنىڭ «سويلەي» الاتىن قابىلەتى بار. قۇرىلعىنى قوسىپ، كىتاپتىڭ مۇقاباسىندا كورسەتىلگەن تاڭباعا جاقىنداتساڭىز، ونىڭ ىشىندەگى ءماتىندى قۇلاققا جاعىمدى داۋىسپەن وقىپ، ءان سالاتىنىنا كوز جەتكىزۋگە بولادى.

ءتىپتى دومبىرا مەن قوبىزدىڭ ءۇنىن دە ەستيسىز. بۇل دۇنيەنى جاساپ شىعارۋ ءۇشىن اۆتور 3 جىلعا دەيىن مەملەكەتتىك قىزمەتتەن باس تارتقان. ناتيجەسىندە 12 كىتاپتان تۇراتىن «دانالىق الىپپەسى» اتتى تاربيەلىك قۇرال كەشەنى جارىق كوردى. ال الىپپەنىڭ ماڭىزدىلىعىن ەلباسى العى ءسوز رەتىندە بىلدىرگەن.

«بەسىك جىرىنان كەيىن ادام بالاسىنا نە كەرەك؟ ەرتەگىلەر كەرەك، ەرتەگىدەن كەيىن اڭىزدار، اڭىزداردان كەيىن ادەمى اڭگىمەلەر، تاربيەلەيتىن التىنساريننىڭ جيناقتاعان اڭگىمەلەرى. ودان كەيىن ناقىل سوزدەر، ماقال-ماتەلدەردى «اتالار ءسوزى» دەپ بەردىك»، - دەيدى ق ر ب ع م مەكتەپكە دەيىنگى بالالىق شاق رەسپۋبليكالىق ورتالىعىنىڭ ديرەكتورى بيجان يگەنبايەۆا.

پەداگوگتىڭ بۇل ازىرگە سوڭعى جۇمىستارىنىڭ ءبىرى ءارى يننوۆاتسيانى قولدانا وتىرىپ شىعارعان جيناعى. بيجان قۇرمانعالي قىزىنىڭ ۇزدىكسىز ىزدەنىسىنىڭ ارقاسىندا 1991-جىلى رەسپۋبليكانىڭ بارلىق مەكتەپتەرىندە «فونوحرەستوماتيا» دەپ اتالاتىن مۇعالىمدەرگە قالاي مانەرلەپ وقۋ كەرەكتىگىن ۇيرەتەتىن قۇرال شىقتى. الىپپە، ءوزىن-ءوزى تانۋ، انا ءتىلى حرەستوماتياسى، ادامگەرشىلىك ساباقتارى، مەن اداممىن سىندى باسقا دا وقۋ-باعدارلامالىق ەڭبەكتەرى جانە بار.

«از ۋاقىتتىڭ ىشىندە ماعان مۇمكىندىك تۋدى باستاۋىش سىنىبىنىڭ مۇعالىمى بولۋعا. سول ساتتەن باستاپ «ءبىلىم نەگىزى باستاۋىش سىنىپتا ەكەن عوي، ەندەشە مەن وسى عىلىمنىڭ باسىن ىزدەيىن» دەپ باستاۋىش سىنىپتىڭ مۇعالىمى بولۋعا تىرىستىم. ناتيجەسىندە وسى الىپپە دۇنيەگە كەلدى»، - دەيدى مامان.

ۇستازدىڭ تاۋەلسىزدىك جىلدارى ءتول وقۋلىقتى شىعارۋعا اتسالىسقانى مەن تىنىمسىز ىزدەنىسى نازاردان تىس قالعان جوق. ق ر ءبىلىم بەرۋ ءىسىنىڭ ۇزدىگى اتاعىمەن، جاس ۇرپاقتى وقىتۋ جانە تاربيەلەۋ ىسىندەگى ەلەۋلى تابىستارى ءۇشىن ى. التىنسارين مەدالىمەن جانە قازاقستان حالقى اسسامبلەياسىنىڭ 20 جىلدىق مەدالىمەن ماراپاتتالعان، دەپ جازادى 24.kz.