قازاق جەرى - شاباندوزداردىڭ مەكەنى
ونى امەريكانىڭ National Geographic جۋرنالىنىڭ فوتورەپورتەرى جانە Western Horseman باسىلىمىنىڭ رەداكتورى رايان بەلل وزدەرىندەگى باياعى جابايى باتىس اتانعان ايماقتارعا قاتتى ۇقساتادى، دەپ جازدى «ەگەمەن قازاقستان» گازەتى.
مۇحيت اسىپ كەلگەن جۋرناليست جاقىندا پاۆلودار مەملەكەتتىك ۋنيۆەرسيتەتىندە بولعانىندا ءوز ءومىرىنىڭ باستى ءمانى مەن نەگىزگى قۇمارلىعى جىلقى ەكەنىن اشىپ ايتىپتى. ۋنيۆەرسيتەت سايتىنىڭ جازۋىنا قاراعاندا، بەلل ۇلتتىق گەوگرافيالىق قوعام فوتوگرافتارى شەڭبەرىندە جىلقى دەگەن جانۋاردىڭ ناعىز بىلگىرى سانالادى. سوندىقتان، ونىڭ قامبار اتا ۇرپاعىنىڭ تىنىس-تىرشىلىگى جايلى فوتورەپورتاجدار كونكۋرستارىندا ىلعي گران-پري جەڭىپ الىپ ءجۇرۋى ءبىر جاعىنان زاڭدىلىق تا بولىپ تابىلادى.
امەريكالىق مەيمان قازاقستاندا جىلقىنىڭ قاتتى قادىرلەنەتىنىن، ونىڭ قاسيەتتەرى تۋرالى ۇنەمى ايتىلىپ وتىراتىنىن كورگەندە، قاتتى قايران قالعانىن جاسىرماي ايتىپتى. ول سونىمەن بىرگە ءوزى تۇراتىن مونتانا شتاتىنداعىلاردىڭ دا جىلقىنى قاتتى قۇرمەتتەيتىنىن، ءبىراق ونىڭ ەتىن جەمەيتىنىن جەتكىزىپتى. دەگەنمەن، قوناق قازاقتاردىڭ كوشپەندىلەر رەتىندەگى ەجەلگى قۇندىلىقتارىنىڭ ءبارىن جاقسى باعالايتىنىن ايتا كەلىپ، سونىڭ ىشىندە ۇلتتىق تاعامدارى مەن تاماقتارىن دا ۇناتىپ قالعانىن ءبىلدىرىپتى.
رايان بەللدىڭ پىكىرىنشە، قازىر بۇكىل الەمگە ايگىلى بولىپ وتىرعان كوۆبويلىق، ياعني شاباندوزدىق ءارى اتبەگىلىك ونەر ءوزىنىڭ باستاۋىن تاپ وسى قازاق دالاسىنان الادى. ول كەزىندە جىلقىلاردىڭ كوشپەندىلەر بەسىگى - ۇلى ساحارانىڭ قاتال تابيعات جاعدايىندا ادامعا ناعىز سەرىك بولعانىن ايتىپ وتىر.
