سەمەيدە «اباي انالارى» اللەياسى اشىلدى

استانا. قازاقپارات - اباي قورىق- مۇراجايىندا «اباي انالارى» اللەياسىنىڭ اشىلۋ سالتاناتى ءوتتى.

اللەياعا 50 گە جۋىق شىرشا مەن 20 عا جۋىق شىڭعىستاۋ قايىڭى ەگىلىپ، ۇلى اقىن ابايدىڭ انالارى -  زەرە مەن ۇلجان تۋرالى مالىمەتتەر بەرىلگەن تاقتا قويىلدى. اباي انالارى زەرە مەن ۇلجان -  اقىن تاربيەسىنىڭ التىن بەسىگى. اباي قۇنانباي ۇلىنىڭ ۇلى تۇلعا رەتىندە قالىپتاسۋىنا ولاردىڭ ىقپالى زور بولعانى تاريحتا بەلگىلى. زەرە بەكتەمىر قىزى (1785-1873) -  ەل اناسى، حالىق مەيىرىمدىلىگى مەن اقىلدىلىعىنا باس يگەن پاراساتتى، دانا اجەلەردىڭ ۇلگىسى.

ال اناسى ۇلجان تۇرپان قىزى (1810-1887) وتە سابىرلى، كەڭ مىنەزدى، سوزگە ۇستا، تاپقىر، شەشەن بولعان. اباي اناسىنىڭ وسىنداي اسىل قاسيەتتەرىن جاستايىنان بويىنا ءسىڭىرىپ وسكەن. اقىلدى كەلىن ۇلجان ەنەسى زەرەمەن تەرەڭ سىيلاستىقتا عۇمىر كەشكەن.

زەرە اجە مەن ۇلجان انادان قازىرگى جاس ۇرپاق قانشاما ۇلگى- ونەگە الارى انىق. «اباي انالارى» اللەياسىنىڭ اشىلۋ سالتاناتىنا قالانىڭ زيالى قاۋىمى، جوعارى وقۋ ورىندارىنىڭ ستۋدەنتتەرى، مەكتەپ وقۋشىلارى جانە ب ا ق وكىلدەرى قاتىستى.

www.24.kz