جايىلىم جەرلەردى ساتۋعا بولمايدى، ول مەملەكەت مەنشىگىندە قالۋى كەرەك - ب. ءابدىعالي

استانا. قازاقپارات - جايىلىم جەرلەردى ساتۋعا بولمايدى. بۇگىن استاناداعى ۇلتتىق مۋزەيدە وتكەن جەر رەفورماسى جونىندەگى رەسپۋبليكالىق كوميسسيانىڭ ەكىنشى وتىرىسىندا كوميسسيا مۇشەسى بەرىك ءابدىعالي وسىلاي مالىمدەدى.

«جايىلىمنىڭ ءوزى وزەكتى ماسەلە. مال باعاتىن اۋىلدار ءۇشىن بۇل پروبلەمانى تەرەڭ زەردەلەۋ كەرەك. ويتكەنى، بۇنى ساتساق، ەرتەڭ اۋىلداردا قاقتىعىستار ورىن الۋى مۇمكىن. حالىق تا جەكەگە وتسە مال باعاتىن جەر قالماي قالا ما دەپ قورقادى. ال ەگىن شارۋاشىلىعىنا كەلسەك، سونىڭ ىشىندە ءبىرقاتار جىلدار بويى وڭدەلىپ جاتقان جەرلەرگە كەلسەك، ونى ساتۋعا بولادى دەپ ەسەپتەيمىن»، - دەدى ب. ءابدىعالي قازاقپارات تىلشىسىنە بەرگەن سۇحباتىندا.

سونىمەن قاتار، كوميسسيا مۇشەسى جەردىڭ يگەرىلۋىن تەكسەرۋگە دە ءجىتى نازار اۋدارۋ قاجەتتىگىن العا تارتتى.

 «ارينە، تەكسەرۋدىڭ وزەكتىلىگى دە بار. ماسەلەن، ەگىنشىلىكپەن اينالىسپايتىن قۇر الىپ العان جەرلەر بارشىلىق، قازاقستاندا. ول جەرلەر توزىپ جاتىر. ماسەلەن، نە ءوزى ەكپەيتىن، نە ەلگە بەرمەيتىن جەردى قايتارۋ كەرەك. اينالىساتىن ادامدارعا بەرىپ، ونى ارى قاراي يگەرۋ ءلازىم. ەگىن ەگۋگە الىپ، ءبىراق اينالىسپاسا وندايلارعا شەكتەۋلەر قويىلعانى يگى»، - دەدى ب. ءابدىعالي.

اۆتور: قانات مامەتقازى ۇلى