جەر رەفورماسى بويىنشا كوميسسيا مۇشەلەرى پارلامەنتتە زاڭ جوباسىن ازىرلەۋگە قاتىسۋ مۇمكىندىكتەرىنە يە بولادى - ب. ساعىنتايەۆ
بۇگىن استاناداعى ۇلتتىق مۋزەيدە ءوتىپ جاتقان جەر رەفورماسى بويىنشا رەسپۋبليكالىق كوميسسيانىڭ وتىرىسىندا كوميسسيا ءتوراعاسى، ق ر پرەمەر- ءمينيسترىنىڭ ءبىرىنشى ورىنباسارى باقىتجان ساعىنتايەۆ وسىلاي ءمالىم ەتتى.
«جۇرت اراسىندا ءبىزدىڭ كوميسسيانىڭ قانشالىقتى وكىلەتتىگى بار، ءوستىپ اڭگىمە ايتىپ كەتە بەرە مە دەگەنگە ساياتىن اڭگىمە ايتىلىپ جاتىر. بۇل رەتتە جاۋاپ بىرەۋ عانا: ەلباسى كوميسسيانى قۇرار كەزدە كوميسسيا رەزونانس تۋدىرعان نورمالاردى كەڭىنەن تالقىلاپ، ۇستانىمدار ازىرلەپ، پارلامەنتكە بەرۋىمىز كەرەك. ءبىزدىڭ كوميسسيا زاڭ قابىلدايتىن پارلامەنت تە ەمەس، قاۋلى قابىلدايتىن ۇكىمەت تە ەمەس. ءبىز ۇسىنىس ەنگىزەتىن بولامىز»، - دەدى ۆيتسە- پرەمەر.
ونىڭ ايتۋىنشا، كوميسسيا نەگىزىنەن پارلامەنتكە ۇسىنىس ەنگىزۋ قۇزىرەتىن جۇزەگە اسىرادى.
«ءبىز وسى قۇزىرەتتى پايدالانىپ، پارلامەنتكە ۇسىنىستى بەرەمىز. پارلامەنت ءوز قىزمەتىندە بەلگىلەنگەن تارتىپپەن جۇمىس توپتارىن قۇرادى، وندا كوميسسيانىڭ قاراماعىنداعى مۇشەلەردىڭ ارى قاراي جۇمىس ىستەۋىنە دە مۇمكىندىك قاراستىرىلادى»، - دەدى ب. ساعىنتايەۆ.
اۆتور: قانات مامەتقازى ۇلى
