شىمكەنتتەگى قاندى كولىك وقيعاسى: ءبىلىم ءبولىمىنىڭ باسشىسى جۇمىسىنان بوساتىلدى
ايدىڭ-كۇننىڭ امانىندا ءبۇلدىرشىننىڭ قىرشىن كەتكەنىنە اشىنعان اكىم قاشىقتان قاتىناپ وقيتىن وقۋشىلار تاسىمالىن دۇرىس ۇيىمداستىرا الماعان قالالىق ءبىلىم ءبولىمىنىڭ باسشىسىن جۇمىسىنان بوساتتى. جولاۋشىنى تولتىرىپ الىپ، كوشەدە جارىس ۇيىمداستىراتىن قوعامدىق كولىكتەردىڭ بەي-بەرەكەتسىزدىگى مەن اياقجولداردىڭ رەتسىزدىگىنە جاۋاپتى قوس مەكەمە باسشىسى سوگىس ارقالادى. جەرگىلىكتى پوليتسيا باسقارماسىنا قيىلىستارداعى جول قوزعالىسىن رەتتەي المايتىن ينسپەكتورلاردى قىزمەتتەن الۋدى تاپسىردى.
ايتا كەتەيىك، جىل باسىنان بەرى قالا اۋماعىندا 321 جول-كولىك وقيعاسى تىركەلىپ، 22 ادام اجال قۇشقان. ونىڭ 12 سى كامەلەتكە تولماعان جاسوسپىرىمدەر.
«مىنا جينالىستا مەنىڭ قانىم قايناپ وتىر. ءبىز بالالارىمىزدىڭ قاۋىپسىزدىگىن قامتاماسىز ەتە الماساق مىنا جەردە ءبارىمىز توپىرلاپ نە ءۇشىن ءجۇرمىز؟! جول قيىلىسىندا نەگە دۇرىس باعدارشام جانبايدى؟ ءتارتىپ بولۋ ءۇشىن ەندى قانشا ادام، قانشا بالا ءولۋى كەرەك؟!» - دەدى قالا اكىمى عابيدوللا ءابدىراحىموۆ جيىندا.
ەستەرىڭىزگە سالايىق، جول اپاتى سالدارىنان 4 جاستاعى بالا كوز جۇمعان بولاتىن. ەكى ايەل اۋرۋحاناعا جەتكىزىلىپ، ولاردىڭ ءبىرى ۇيىنە جىبەرىلسە، ەكىنشىسى جان ساقتاۋ بولىمىنە جاتقىزىلدى. وبلىستىق بالالار اۋرۋحاناسىنا باس دارىگەردىڭ ورىنباسارىنىڭ ايتۋىنشا، 5 بالا كەلىپ تۇسكەن. ولاردىڭ ۇشەۋى قاجەتتى كومەك كورسەتىلگەننەن كەيىن ۇيلەرىنە قايتارىلىپ، ەكەۋى اۋرۋحاناعا جاتقىزىلدى. تاعى قالالىق بالالار اۋرۋحاناسىنا جاتقىزىلعان تاعى ءبىر بالانىڭ جاعدايى اۋىر.
وقيعاعا قاتىستى ق ر ق ك 345-بابى بويىنشا سوتقا دەيىنگى تەرگەۋ امالدارى جۇرگىزىلۋدە. جۇرگىزۋشى ۋاقىتشا ۇستاۋ يزولياتورىنا قامالدى. ساراپتاما جۇرگىزۋ بارىسىندا 19 جاستاعى جىگىتتىڭ ىشىمدىك ىشپەگەنى بەلگىلى بولدى. باسقا دا ساراپتامالار جاسالىپ جاتىر.
