استانادا «جاس قانات» مۋزىكالىق بايقاۋى ءوز شىمىلدىعىن اشتى - فوتو

استانا. قازاقپارات - ەلوردادا ەلىمىزدىڭ باستى مۋزىكالىق بايقاۋلارىنىڭ ءبىرى «جاس قانات» ءوز شىمىلدىعىن اشتى.

بيىل جاس ورىنداۋشىلار بايقاۋى 25- رەت وتكىزىلمەك. بەيبىتشىلىك جانە كەلىسىم سارايىندا ەرەكشە مۋزىكالىق اتموسفەرا ورناپ، قوناقتار نازارىنا ادەمى دەكوراتسيالار ۇسىنىلدى، دەپ حابارلادى قالالىق اكىمدىكتىڭ باسپا ءسوز قىزمەتى.

بايقاۋ 2001 -جىلدان بەرى استانادا ۇيىمداستىرىلۋدا. شارانىڭ اشىلۋ سالتاناتىنا العاش بولىپ وتاندىق ەسترادا جۇلدىزدارى - بۇرىنعى بايقاۋلاردىڭ جەڭىمپازدارى مەدەۋ ارىنبايەۆ، ەرلان كوكەيەۆ، باقىت شادايەۆا، نۇرلان ابدۋللين، ءمادينا ءسادۋاقاسوۆا، جانار دوعالوۆا، مارجان اراپبايەۆا، سونداي-اق، كونكۋرستىڭ نەگىزىن قالاۋشى مۇرات ەرعاليەۆ كەلدى. استانا اكىمىنىڭ ورىنباسارى ەرمەك امانشايەۆ كونكۋرسقا قاتىسۋشىلارعا ساتتىلىك تىلەدى.

- بيىل «جاس قاناتقا» 25 جىل بولادى. «جاس قانات» زور مۇمكىندىكتەرگە جول اشادى - بۇل بولاشاق جۇلدىزدار ءۇشىن موبيلدى، كرەاتيۆتى، جەڭىل الاڭ، اتالعان بايقاۋ تاۋەلسىزدىگىمىزدىڭ قۇرداسى. وسى جىلدار ىشىندە تەلەكورەرمەندەرمەن، ۇيىمداستىرۋشىلارمەن بىرگە «جاس قانات» دامىپ، ءوسىپ كەلەدى، - دەدى ەرمەك امانشايەۆ.

بيىل بايقاۋدا اقتوبە، ورال، سەمەي، وسكەمەن، الماتى، تالدىقورعان، شىمكەنت، جەزقازعان جانە قاراعاندى قالالارىنان كەلگەن 14 قاتىسۋشى باعىن سىنايدى. ءۇش ورىنداۋشى ەلوردا نامىسىن قورعايدى.

كونكۋرسقا قاتىسۋشىلار ءان ايتۋ شەبەرلىكتەرىن، حورەوگرافيالىق دايىندىعىن جانە ادەمى كوستيۋمدەرىن كورسەتتى. ق ر ەڭبەك سىڭىرگەن مادەنيەت قايراتكەرلەرى مەن بۇرىنعى «جاس قانات» جەڭىمپازدارىنان قۇرىلعان قازىلار القاسى ورىنداۋشىلاردى سۇيسىنە تىڭدادى.

ايتا كەتەيىك، جاس ورىنداۋشىلاردىڭ «جاس قانات» بايقاۋى 22 -مامىرعا دەيىن وتەدى. بۇل كۇنى قازىلار القاسى جەڭىمپازدىڭ ەسىمىن جاريا ەتەدى.