الماتى وبلىسىنىڭ ۇزدىك مادەنيەت مەكەمەسى اۆتوكولىك ۇتىپ الدى - فوتو

تالدىقورعان. قازاقپارات - م. تىنىشبايەۆ اتىنداعى تاريحي-ولكەتانۋ مۇراجايى الماتى وبلىسىنداعى «ۇزدىك مادەنيەت مەكەمەسى» بولىپ تانىلىپ، اۆتوكولىك ۇتىپ الدى.

بۇگىن تالدىقورعان قالاسىندا ءى. جانسۇگىروۆ اتىنداعى مادەنيەت سارايىندا مادەنيەت جانە ونەر قىزمەتكەرلەرىنىڭ كاسىبي مەرەكەسىنە وراي وتكەن جيىندا وزگە دە ونەر ۇجىمدارى مەن ونەرپازدار ارنايى ديپلومدارمەن جانە 100 مىڭ تەڭگە اقشالاي سىيلىقتارمەن ماراپاتتالدى، دەپ حابارلايدى وبلىس اكىمىنىڭ باسپا ءسوز قىزمەتى.

ءداستۇرلى تۇردە ءۇشىنشى جىل ۇيىمداستىرىلىپ وتىرعان بۇل كاسىبي مەرەكەدە اۋدان، قالالاردىڭ، وبلىستىق مەكەمەلەرىنىڭ 2016 -جىلعى جەتىستىكتەرىن كورسەتەتىن كورمە ۇيىمداستىرىلىپ، مادەنيەت سالاسىنىڭ تىنىس- تىرشىلىگى تۋرالى ارنايى دايىندالعان فيلم كورسەتىلەدى.

سالتاناتتى جيىندا ءسوز سويلەگەن وبلىس اكىمى اماندىق باتالوۆ وبلىستاعى مادەنيەت جانە ونەر ۇجىمدارىنىڭ جەتكەن جەتىستىكتەرىنە، ەل تاۋەلسىزدىگىنىڭ 25 جىلىندا اتقارىلعان يگى ىستەردى ناسيحاتتاۋداعى ونەر ادامدارىنىڭ سىڭىرگەن ەڭبەگىنە، سونىمەن قاتار العا قويعان مىندەتتەرگە توقتالىپ ءوتىپ، رۋحاني سالانى دامىتۋعا ەرەكشە نازار اۋدارىلىپ وتىرعانىن جەتكىزدى. مادەنيەت نىساندارىنا كۇردەلى جوندەۋ جۇرگىزىلىپ، جاڭا نىسانداردىڭ قۇرىلىستارى باستالۋدا، شتات ءبولىنىپ، ماتەريالدىق- تەحنيكالىق بازالارى نىعايتىلىپ كەلەدى. بۇل ورايدا ەسكەرتكىشتەر ورناتۋعا، كىتاپ باسۋ ىسىنە دە ايرىقشا نازار اۋدارىلىپ وتىر. وسى جانە وزگە دە اتقارىلعان ىستەر مەن كورسەتىلگەن قولداۋلار تۋرالى اتاپ وتكەن وبلىس باسشىسى ا. باتالوۆ:

- قۇرمەتتى ونەر سالاسىنىڭ قىزمەتكەرلەرى مەن ارداگەرلەرى! بۇگىنگى ەرەكشە مەرەكە كۇنى مادەنيەت پەن ونەر سالاسىنا ەڭبەگى سىڭگەن اعا بۋىن وكىلدەرىنە ايتار العىسىمىز شەكسىز. ەلىمىزدىڭ وركەندەپ- وسۋىنە، مادەنيەت بيىگىنە شىعارماشىلىق تۇرعىدان قىزمەت ەتىپ، حالىقتى تاماشا ونەرلەرىڭىزبەن قۋانتا بەرىڭىزدەر! - دەپ ىزگى تىلەگىن جەتكىزدى.

قۇتتىقتاۋ سوزىنەن كەيىن ا. باتالوۆ ءوز ءىسىنىڭ ۇزدىكتەرىن ماراپاتتاپ، وبلىس اكىمىنىڭ جانە قر مادەنيەت جانە سپورت مينيسترلىگىنىڭ قۇرمەت گراموتالارىن، سونىمەن قاتار 16 نوميناتسيا بويىنشا جەڭىمپازدارعا سىيلىقتار تاپسىردى.

اتاپ ايتقاندا، وبلىستىق ب. ريموۆا اتىنداعى دراما تەاتر ءارتىسى بازارباي توقىمتايەۆ «ۇزدىك اكتەر»، وسى ۇجىمنىڭ اكتريساسى تولعاناي اعلاموۆا «ۇزدىك اكتريسا» اتاندى.

ءسۇيىنباي اتىنداعى وبلىستىق فيلارمونيا ءانشىسى باقبەرگەن اسقاربەكوۆ «ۇزدىك ءانشى»، وسى ونەر وشاعىنىڭ ونەرپازدارى التىناي كۇرىشبايەۆا «ۇزدىك ءبيشى»، الما كىشىكبايەۆا «ۇزدىك مۋزىكالىق اسپاپتا ورىنداۋشى» نوميناتسياسىن جەڭىپ الدى.

سول سياقتى جامبىل اۋدانى قاراكەستەك اۋىلدىق جانە ىلە اۋداندىق كىتاپحانالارى، پانفيلوۆ اۋدانىنداعى «ايجانقىز» حالىقتىق ءبي انسامبلى جانە باسقا دا ءبىرقاتار ۇجىمدار ۇزدىكتەر قاتارىنان كورىندى. جەڭىمپازداردىڭ بارلىعىنا ديپلوم جانە 100 مىڭ تەڭگەنىڭ سەرتيفيكاتى تابىستالدى.

سونداي-اق «ءسۇيىنباي سازى» فولكلورلىق-ەتنوگرافيالىق انسامبلىنە جاڭا اۆتوبۋستىڭ كىلتى بەرىلدى.

مادەنيەت سالاسىنىڭ ارداگەرى رەتىندە نادەجدا لۋشنيكوۆا مەن سالا قىزمەتكەرلەرى اتىنان الاكول اۋداندىق مادەنيەت جانە تىلدەردى دامىتۋ ءبولىمىنىڭ باسشىسى ارنۇر سادىقوۆ ءسوز سويلەپ، مەرەكە قورىتىندىسىندا ونەر شەبەرلەرىنىڭ كونسەرتى ۇسىنىلدى.