الماتىدا مۋزەي ءتۇنى اياسىندا د. قونايەۆ مۋزەيىندە ەرەكشە ستيلىندە مەرەكەلىك كونسەرت وتۋدە - فوتو

الماتى. قازاقپارات- بۇگىن الماتىدا حالىقارالىق مۋزەيلەر كۇنىنە ورايلاستىرىلعان مۋزەي ءتۇنى اكسياسى اياسىندا د. ا. قونايەۆ مۋزەيىندە ەرەكشە كەشەندى مەرەكەلىك شارا ۇيىمداستىرىلدى.

بۇل ءۇشىن مۋزەي اۋلاسى مەرەكەلىك سيپاتتا ءساندى ەتىپ بەزەندىرىلدى. اۋلانىڭ ءتور جاعىنا كىشىگىرىم ساحنا جاسالدى، ال ونىڭ قاسىنا قويىلعان ۇلكەن جارنامالىق تاقتاعا كەڭەس زامانىنداعى پلاكاتتار، كينو- كونتسەرتتىك افيشالار جاپسىرىلدى.

«ءبىز بيىلعى شارانى وزىندىك ءبىر رەترو ستيلىندە ۇيىمداستىرۋدى ءجون كوردىك. مۇندا ەڭ الدىمەن جۇرگەنوۆ اتىنداعى ونەر اكادەمياسى، ج. ەلەبەكوۆ اتىنداعى ەسترادا- سيرك كوللەدجىنىڭ ستۋدەنتتەرىنىڭ قاتىسۋىمەن كونسەرت بولادى. وندا حالىق اندەرىمەن قاتار، ديماش اعانىڭ ءسۇيىپ تىڭدايتىن اندەرى، كەڭەستىك كينوفيلدەردەگى اندەر شىرقالادى. ءبيشى قىزدارىمىز مىڭ بۇرالىپ، ءار ءتۇرلى ۇلتتىق بيلەردى ورىنداسا، بولاشاق سيرك ارتيستەرى دە ءوز ونەرلەرىن پاش ەتەدى. بۇعان قوسا، وتكەن عاسىردىڭ 50-60- جىلدارىنداعى ستيلدە مەرەكەلىك رەترو- ديسكوتەكا ۇيىمداستىرىلادى. شاراعا قاتىستى دەكوراتسيالاردى ءوز كۇشىمىزبەن جاسادىق»، - دەدى «قازاقپارات» تىلشىسىنە بەرگەن سۇحباتىندا د. ا. قونايەۆ مۋزەيىنىڭ جەتەكشىسى لاۋرا بەيسەكوۆا.

سونىمەن قاتار، ول بۇگىنگى شارا بارىسىندا كەشكى ساعات 19:30 دان 23:30 عا دەيىن مۋزەيدىڭ ەكىنشى قاباتىندا دىنمۇحامەد احمەت ۇلىنىڭ جاقىن تۋىستارىنىڭ قاتىسۋىمەن، كەلگەن قوناقتارعا شاي بەرىلەتىندىگىن ايتتى.

«بۇل كەزدەسۋگە ديماش اعانىڭ قارىنداسى روزا احمەت قىزى، نەمەرە قارىنداسى جاننەت داۋلەت قىزى جانە نەمەرە ىنىلەرى كەلىپ، ديماش اعانىڭ ءومىرى مەن قىزمەتى تۋرالى اڭگىمەلەيدى. مۇنداي باسقوسۋدىڭ جاستارعا بەرەر تاربيەلىك ءمانى وتە زور دەپ بىلەم. ويتكەنى، كەزىندە ەل باسقارعان ديماش احمەت ۇلى قونايەۆ ۇلگى تۇتارلىق ۇلى تۇلعا. مەن ءوز باسىم ديماش اعانى ۋاقىت وتكەن سايىن جاڭا قىرىنان تانىپ، ءتانتى بولىپ جۇرەمىن»، - دەدى ل. بەيسەكوۆا.

ايتا كەتەلىك، بۇل كەشكى شايعا الدىن الا جازبا بويىنشا تىركەلگەن قوناقتار قاتىسا الادى.

ال جالپى، مەرەكەلىك شارا بارىسىندا كەلۋشىلەردىڭ لەگىنە قاراي مۋزەيگە ەكسكۋرسيا جاسالادى جانە ديماش احمەت ۇلى جايلى ارنايى سۇراق- جاۋاپ بايقاۋى ۇيىمداستىرىلادى. وندا جەڭىپ شىققاندارعا مۋزەي قىزمەتكەرلەرىنىڭ دايىنداعان سىيلىقتارى تابىس ەتىلەدى.

بۇگىن د. قونايەۆ مۋزەيىندەگى مۋزەي ءتۇنى شاراسى تۇنگى ساعات 23:00 گە دەيىن جالعاسادى. ونى تاماشالاۋعا 1000 نان استام ادام كەلەدى دەپ كۇتىلۋدە.

قازىر مەرەكەلىك شارا ودان ءارى جالعاسىپ جاتىر. ول كەشكى ساعات 18:00 دە باستالدى.