مۇعالىمدەردىڭ بەدەلىن قالاي كوتەرەمىز؟

استانا. قازاقپارات - ۇستازدىڭ قادىرى مەن قاسيەتى ەشقاشان تومەندەمەۋى كەرەك.

ءبىراق، بۇگىنگى قوعامدا وسى ءبىر كيەلى ماماندىقتىڭ بەدەلىن تۇسىرەردەي نەگە سونشا بەيقام بولىپ كەتتىك.

ارينە، مۇعالىمدەر تىكەلەي ۇكىمەتكە شىعىپ ايتا المايدى. سەبەبى، ۇكىمەت ءۇيىنىڭ تابالدىرىعى تاۋدان بيىك. ەندەشە، وعان قوعام بولىپ نەگە ءۇن قوسپايمىز؟

سايلاۋ كەلسە كوشە ارالاپ، سايلاۋشىلاردىڭ ءتىزىمىن جاسايتىن - ۇستازدار. ءتىپتى، سول تىزىمدەگى ءبىر ادام كەلمەي قالسا، سول ءۇشىن سوگىس الاتىن دا وسى كىسىلەر ەكەنىن بىلەمىز. ونسىز دا قاعازباستىلىقتىڭ «قۇربانى» بولىپ، ايلىعى شايلىعىنا جەتپەيتىن ۇستازدارىمىزدىڭ ەندى «كوشە ارالاپ، قوقىس تەرۋى» سىزگە ايانىشتى كورىنبەي مە؟ ارينە، ول جالپىعا ورتاق سەنبىلىك بولسا، ءسوز جوق، ءبىراق اكىمدەر مەن باسقا دا لاۋازىمدى ادامداردىڭ جۇرەر جولىن تازالاۋ ۇستاز مىندەتىنە جاتا ما؟

وسى ورايدا الماتى وبلىسى، تالعار اۋدانىنا قاراستى تۇزدىباستاۋ اۋىلىنداعى №13 جالپى ءبىلىم بەرەتىن ورتا مەكتەپتىڭ مۇعالىمدەرىمەن كەزدەسىپ شىنايى سويلەستىك. ءبىراق ادەتتەگىدەي ولار اتتارىن اتاماۋدى ءوتىندى.

«جىلدا كوكتەمدە بۇكىل كۇرەجول بويىندا اعاش اقتالادى. سەندەردىڭ مىندەتتى كۇرە جولدارىڭ دەپ الاتاۋ تراسساسىن تازالاتتى. ون- جيىرما كۇندەي سونىڭ بويىندا جۇردىك. كۇنىنە 10-15 ءمۇعالىم شىعادى. بۇكىل كۇرەجولدى تازارتىپ جۇرگەنىمىز. كوگالداندىرۋ بار، بۇكىل تالعار كۇرەجولىنىڭ بويى بار، الاتاۋ كۇرەجولى بار، قالعان بەساعاشتىڭ بويىنداعى ەكى مەكتەپ بار، ءتىپتى ەلدىڭ ەسىگىنىڭ الدىنداعى اعاشىنا دەيىن كەسىپ- شاپقان كەزدەرىمىز بولدى. بىلتىر پرەزيدەنت كەلەدى دەگەن كۇندەرى بارلىق ەر مۇعالىمدەردى «ماگنۋمنان» بەرى قاراي اعاش كەستىرۋگە الىپ كەتتى. نەشە كۇن اعاش شاۋىپ، ءتۇبىن اقتاپ، ەلدىڭ ەسىگىنىڭ الدىنداعى ءشوپتى ورىپ، بۇتالعان اعاشتاردى جيناپ- ورتەپ تاپ- تۇيناقتاي ەتكىزدى. ءبىر ىستەگەن جەردى ءۇش رەت ىستەتتى. اۋداندىق ءبىلىم ءبولىمى بار، اۋدان اكىمىنەن باستاپ قىسىپ، ءبىر ىستەگەن جەردى ەكى كۇن ىستەدىك. بىتكەن كەزدە دۇرىس ىستەمەدىڭدەر دەپ قايتادان جاساتتى. اكىمشىلىك تەك ءبىز بايعۇستى جۇمساي بەرگەنشە نەگە اۋىل ادامدارىن جۇمىلدىرمايدى؟ ولاردىڭ قولىندا بيلىك بار، اكىمشىلىك شارا قولدانا الادى عوي. ولارعا ۇندەمەيتىن «تەگىن قارا كۇش» الدەقايدا جەڭىل. ءبىزدىڭ ول كۇنى ساباعىمىز قالىپ قويادى. ساباقتارىمىز باسقا مۇعالىمگە تابىستالادى، اركىم ءبىر ساباق بەرگەن وقۋشى قانداي ءبىلىم الادى؟ مىسالى، باستاۋىش سىنىپتىڭ مۇعالىمدەرى ەكى سىنىپقا جۇگىرەدى. ول كۇنى بالا بوسقا كەلىپ قايتادى دەگەن ءسوز. باستاۋىشتىڭ ساباقتارىن ەشكىمدە الماستىرا المايدى».

«...تۇزدىباستاۋدىڭ بۇرىش- بۇرىشىنان ءيت- مىسىقتاردىڭ ولىكتەرىن تەردىك. اعاش اقتادىق، جول بويىنداعى قوقىستاردى تازالادىق. كۇزدە ساي جارلارداعى ۇلكەن-ۇلكەن اعاشتاردى ەر مۇعالىمدەر كەستى، ءبىز ولاردى تاسىپ، ورتەدىك. مەكتەپتىڭ اينالاسىنا مۇلدە شىققان جوقپىز، تەك سول كوشەلەردى، ءار ءۇيدىڭ ەسىگىنىڭ الدىن تازارتتىق. ءتىپتى ءبىر شال شىعىپ «مىنا تەمىردى نەگە الىپ كەتپەيسىڭدەر» دەپ ۇرىسقان كەزى دە بولعان. ول كۇرە جولدىڭ بويى بولسا ءبىر ءجون، اركىمنىڭ ەسىگىنىڭ الدى دەگەن شەكتەن شىققاندىق قوي. ولار نەگە وزدەرى تازالامايدى».

اتتارىن جاسىرىن ۇستاۋدى وتىنگەن ۇستازداردىڭ وسىنداي تالاپ تىلەكتەرى مينيسترلىك تاراپىنان قولداۋعا يە بولۋى ءتيىس. سەبەبى، قازاقستان رەسپۋبليكاسىنىڭ 2007 -جىلعى 27 -شىلدەدەگى № 319 ءبىلىم تۋرالى زاڭى 51 -بابىنىڭ 4 -تارماعىندا «قازاقستان رەسپۋبليكاسىنىڭ زاڭدارىندا كوزدەلگەن جاعدايلاردى قوسپاعاندا، پەداگوگ قىزمەتكەرلەردى وزدەرىنىڭ كاسىپتىك مىندەتتەرىن ورىنداۋ مەن بايلانىسى جوق جۇمىس تۇرلەرىنە تارتۋعا جول بەرىلمەيدى. » دەپ كورسەتىلگەن. دەمەك، ءبىلىم قىزمەتكەلەرىن ەركىنەن تىس شارالارعا جۇمىلدىرۋ زاڭدى بەلشەسىنەن باسقاندىق.

قورىتا ايتقاندا، ۇلت بولاشاعى - ۇستازدىڭ قولىندا. ەگەر ەلدىڭ ىلگەرى قادام باسىپ، ءبىلىم كوكجيەگىندە ەركىن قانات سامعاعانىن قالاساق، ۇستازعا جاعداي جاسالۋى كەرەك. جانە، «ۇستاز دەگەنىمىز - اكىمنىڭ كۇرەگى ەمەس، مەكتەپتىڭ جۇرەگى» ەكەنىن ۇمىتپايىق!

elana.kz