ب ق و قوعامدىق كەڭەسىنىڭ وتىرىسىندا جەر رەفورماسى تۋرالى اشىق پىكىر ايتىلدى
وبلىس اكىمى التاي كولگىنوۆتىڭ اتاپ وتكەنىندەي، جيىنداعى ۇسىنىس- تىلەكتەردىڭ بارلىعى جيناقتالىپ، جەر رەفورماسى بويىنشا رەسپۋبليكالىق كوميسسياعا جەتكىزىلەتىن بولادى.
اكىمنىڭ سوزىنە قاراعاندا، باتىس قازاقستان وبلىسىندا 5 ميلليون 700 مىڭ گەكتار اۋىل شارۋاشىلىعى جەرى بولسا، سونىڭ 4,5 ميلليون گەكتاردايى - ەگىن، شابىندىق، جايىلىمدىق جانە سۋارمالى جەرلەر. سوڭعى ءتورت جىلدا جۇرگىزىلگەن تۇگەندەۋ جۇمىستارى ناتيجەسىندە 1 ميلليون گەكتار جەردىڭ يگەرىلمەگەنى انىقتالدى. سونىڭ 700 مىڭ گەكتارى مەملەكەت مەنشىگىنە قايتارىلىپ، جەرمەن اينالىسقىسى كەلەتىن ادامدارعا بەرىلدى. قالعان 300 مىڭ گەكتار جەردى دە ءتيىمدى پايدالانۋ قاجەت. جەر رەفورماسىن حالىققا ءتۇسىندىرۋ باعىتىندا وسىنداي جيىندار وتكىزىلۋدە. مۇندا اركىم ءوز ۇسىنىسىن اشىق ايتا الادى.
بۇدان كەيىن جەر رەفورماسى بويىنشا رەسپۋبليكالىق كوميسسيا مۇشەسى، «اقاس» شارۋا قوجالىعىنىڭ جەتەكشىسى قاتاۋوللا اشىعاليەۆ استانا قالاسىندا ۇكىمەت باسشىسىنىڭ ءبىرىنشى ورىنباسارى باقىتجان ساعىنتايەۆتىڭ ءتوراعالىق ەتۋىمەن وتكەن العاشقى وتىرىستا تالقىلانعان ماسەلەلەر تۋرالى حاباردار ەتتى.
«قازىرگى كەزدە باستى تالاستى ماسەلە شەتەلدىكتەرگە جەردى جالعا بەرۋ توڭىرەگىندە ەكەنى بەلگىلى. اسىرەسە، قازاقستانمەن شەكارالاس ەلدەر ازاماتتارىنا جەر بەرىلسە، ول ۇلتتىق قاۋىپسىزدىككە قاۋىپ ءتوندىرۋى مۇمكىن. ەڭ باستىسى، جەر ماسەلەسى كەڭىنەن تالقىلانۋدا، وسىدان ورتاق توقتامعا كەلۋ قيىن ەمەس. مەنىڭ پىكىرىم: جەرمەن جۇمىس جاساۋ وڭاي ەمەس، مۇنى شارۋالار جاقسى بىلەدى. جەكە مەنشىك - نارىقتىق قاتىناستار نەگىزى. سوندىقتان جەرگە جەكە مەنشىك تە، جالعا بەرۋ دە قاتار ءومىر سۇرە الادى. ينۆەستيتسيامەن بىرگە جاڭا تەحنولوگيا كەلەدى. بۇدان مەملەكەت ۇتادى»، - دەدى ول.
جيىندا ەڭبەك ارداگەرلەرى عازيز حايمۋلدين، نۇرلان ىزتەلەۋوۆ، تيحون ءالىپقالي، امانجول زينۋللين جانە باسقالار جەردى شەتەلدىكتەرگە جالعا بەرۋدىڭ دۇرىس ەمەستىگىن ايتىپ، بۇعان بالاما جولدار ۇسىندى. ياعني بۇل جەردە ەڭ الدىمەن قازاقستاندىق ازاماتتاردىڭ مۇددەسى ەسكەرىلۋى كەرەك. مىسالى، يگەرىلمەي، بوس جاتقان جەرلەر بولسا، بۇرىنعىداي شارۋاشىلىقتار قۇرىپ، نەگە ءتيىمدى پايدالانباسقا!؟ ەگەر جەر ساتىلعان جاعدايدا ونى اقشاسى بارلار يەلەنەدى دە، ونسىز دا اۋىلدا مالى جايىلاتىن جەر تاپپاي وتىرعان تۇرعىندار قايتپەك؟ بۇل ەسكى جەر داۋىنا قايتا اكەلمەي مە، وسىنىڭ ءبارى مۇقيات ەسكەرىلۋى كەرەك. سونىمەن قاتار شەتەلدىكتەر ءوز پايداسىن كوزدەپ، سىنالاپ ەنىپ كەتپەۋى ءۇشىن جەر كودەكسىنىڭ ءدۇدامال، ەكىۇشتى تۇستارىن قايتا قاراپ، تۇزەتۋ قاجەت. ەڭ باستىسى، ەل تاۋەلسىزدىگىنە قاۋىپ تونبەۋى ءتيىس.
جيىندا سونداي- اق اقىندار باۋىرجان حاليوللا، ايسۇلۋ قادىربايەۆا، شولپان قىدىرنيازوۆا، اقۇشتاپ باقتىگەرەيەۆا، جۋرناليست قاجىمۇقان عابدوللا، بلوگەر نۇرلان ءسادىر، شارۋالار ماعاۋيا زاينۋللين، جامبىل ءناسيمۋللين، سەرگەي شوڭايبەكوۆ، بارلىعى وتىزدان استام ادام ءوز ۋاجدەرىن كەلتىرىپ، ۇسىنىس- پىكىرلەرىن ءبىلدىردى.
اۆتور: ەلجان ەرالى
