ابىلاي حان تۋرالى كينو ءتۇسىرىلىپ جاتىر - فوتو
وعان بىرنەشە كينو كارتينالاردىڭ اۆتورى، بەلگىلى رەجيسسەر جورابەك مۇسابايەۆ كىرىستى.
كينو تۋىندى ءۇش ءجۇزدىڭ باسىن بىرىكتىرىپ، جاۋعا قارسى ايباتىن اسىرعان حاننىڭ تاعدىرىنان سىر شەرتەدى.
2016-جىلى كورەرمەنگە جول تارتاتىن فيلمنىڭ قازىر 80 پايىزى ءتۇسىرىلىپ بىتكەن. تاريحي جانرداعى تۋىندى «كوشپەندىلەر» سىندى رومان جەلىسىنە ۇقساس. رەجيسسەر جورابەك مۇسابايەۆ بۇل تۋىندىنىڭ تەك سەناريىنە 2 جىل ۋاقىت جۇمساعانىن ايتادى.
اۆتور تاريحي كينوتۋىندى ءتۇسىرۋدى كوپتەن جوسپارلاپ جۇرگەنىن جەتكىزدى. جان-جاقتى ىزدەنە كەلىپ، فيلم تۇسىرۋگە بەل بۋعان.
2 بولىمگە جوسپارلانعان كينونىڭ 1-بولىمىندە ابىلايحاننىڭ 2 جاسىنان باستاپ، 16 جاسقا دەيىنگى كەزەڭى قامتىلادى. ال 2-بولىمىندە 16 جاستان كەيىنگى ءومىرىن ءتۇسىرۋ جوسپارلانعان.
كينوتۋىندى جەرگىلىكتى حالىق قالاۋلىلارىنىڭ قولداۋىمەن تۇسىرىلۋدە. ءابىلمانسۇردىڭ ءارتۇرلى جاستاعى كەزەڭىن بىرنەشە ادام سومدايدى. ال حان ابىلايدىڭ ءرولىن رەجيسسەر ءوزى وينايدى.
«بۇل فيلم ابىلاي حاننىڭ جاس كەزى جايىندا. قالاي وسكەنى، قالاي ەر جۇرەك بولعانى، وسى جولداعى دايىندىعى تۋرالى. كينو تۋىندىنىڭ باسى قارامۇرتتاعى مادەني جانە تۇلكىباس اۋدانىنداعى بالىقشى دەگەن جەردە ءتۇسىرىلدى. تابيعاتتى تاڭداۋ باسىندا ولكەمىزدىڭ شىرايلى جەرلەرىن كورسەتۋدى ماقسات تۇتتىق. جالشىدان حان بولۋ وڭاي ەمەس، ول قانداي ورتادا ءوستى، كىمنىڭ تاربيەسىن الدى، مىنە، فيلم وسىعان باعىتتالدى. فيلم سەناريى «كوشپەندىلەر» رومانى مەن قازىبەك تاۋاسار ۇلىنىڭ جازبا دەرەكتەرى نەگىزىنە قۇرىلدى. 1 جىل دايىندالدىم. 2 جىل سەناريگە ۋاقىت كەتتى. دراماتۋرگتار مەن تاريحشىلار قاراپ شىقتى. سەناري ورىس تىلىندە جازىلدى. ەلىمىزدىڭ بەلگىلى دراماتۋرگى ءومىرزاق مۇقاي تانىسىپ، ۇناتىپ، اۋداردى»، - دەيدى جورابەك مۇسابايەۆ.
ابىلايدىڭ سارى سابالاق اتانۋ سەبەبىنە ءتۇرلى پىكىرلەر ايتىلىپ جۇرگەنى راس. بۇل شىعارما كورەرمەنگە ناقتى جاۋاپ الۋعا مۇمكىندىك بەرەدى. ابىلايدىڭ جاۋعا قارسى سوعىسىنىڭ ەپيزودىن حيۋادا ءتۇسىرۋ جوسپارلانىپ وتىر. قازىر بۇل بويىنشا كورشى ەلمەن كەلىسىم جۇرگىزىلۋدە، دەپ جازادى otyrar.kz.
