ب ۇ ۇ بالالار قورىنىڭ قازاقستانداعى وكىلى وڭتۇستىك قازاقستاندا ساپارمەن بولدى

شىمكەنت. قازاقپارات - بۇگىن ب ۇ ۇ بالالار قورىنىڭ (ي ن ي س ە ف) قازاقستانداعى وكىلى يۋري وكساميتنىي باستاعان دەلەگاتسيا وڭتۇستىك قازاقستان وبلىسىنا جۇمىس ساپارىمەن كەلدى. جۇمىس توبى شىمكەنتتەگى بالالارعا ارنالعان بىرنەشە مەديتسينالىق ۇيىمداردى ارالادى.

وبلىس اكىمدىگىنىڭ باسپا ءسوز قىزمەتىنىڭ حابارلاۋىنشا، دەلەگاتسيا مۇشەلەرى، ەڭ الدىمەن، «نۇرسات» شاعىن اۋدانىنداعى №4 -وبلىستىق بالالار پەريناتالدىق ورتالىعىندا بولدى. باس دارىگەر ل. ۇكىبايەۆا دەلەگاتسيانى مەديتسينالىق ۇيىمنىڭ جۇمىس بارىسىمەن تانىستىرىپ، ونداعى نارەستەلەر مەن انالاردىڭ جاعدايلارىن كورسەتتى. وندا ماماندار جۇكتى ايەلدەر مەن نارەستەلەردىڭ پاتولوگيالىق بولىمدەرى تۋرالى ءسوز ەتتى.

مۇنان سوڭ، دەلەگاتسيا وبلىستىق بالالار اۋرۋحاناسىنا باردى. بۇگىندە بۇل وبلىس بالالارىنا مامانداندىرىلعان جانە جوعارى تەحنولوگيالىق كومەك كورسەتەتىن ەڭ ءىرى مەديتسينالىق ورتالىق بولىپ سانالادى.

باعدارلاما بارىسىندا ب ۇ ۇ بالالار قورى دەلەگاتسياسى ينفەكتسيالىق اۋرۋلاردى ەمدەۋ مەن الدىن الۋ جونىندەگى «انا مەن بالا» وبلىستىق وڭالتۋ ورتالىعىندا دا بولدى. باس دارىگەر ب. شەريەۆ مەكەمەنىڭ جۇمىسىنداعى باستى باعىتتاردى اتاپ كورسەتىپ، مەكەمەنىڭ ءىشىن ارالاتتى.

جۇمىس ساپارى سوڭىندا ي. وكساميتنىي ءوز پىكىرىمەن ءبولىسىپ، وبلىستا دەنساۋلىق ساقتاۋ سالاسىندا اتقارىلىپ جاتقان جۇمىستاردىڭ ماڭىزدىلىعىنا توقتالدى. اتاپ ايتقاندا، بالالار ماسەلەسىنە بايلانىستى حالىقارالىق دەڭگەيدە بىرلەسە جۇمىس ىستەۋدى كەڭەيتە تۇسۋگە شاقىردى.

ايتا كەتەيىك، بىرىككەن ۇلتتار ۇيىمىنىڭ بالالار قورى - 190 نان اسا ەلدى قامتىعان، بالالاردىڭ قۇقىن قورعايتىن، ولاردىڭ باستى سۇرانىستارىن قاناعاتتاندىرۋعا جانە جان- جاقتى دامۋ مۇمكىنشىلىكتەرىن كەڭەيتۋگە ىقپال ەتەتىن الەمدەگى ءىرى ۇيىم بولىپ تابىلادى.