اتاقتى ادامدار قويىلاتىن قابىر قۇرىلىسىنىڭ ساراپتامالىق قۇنى عانا بەلگىلى - قارجى ءمينيسترى

استانا. قازاقپارات - ۇلتتىق پانتەون (اتاقتى ادامدار قويىلاتىن قابىر - رەد.) قۇرىلىسى قۇنىنىڭ ساراپتامالىق باعاسى عانا بەلگىلى.

بۇل تۋرالى بۇگىن ماجىلىستە 2015 -جىلعى رەسپۋبليكالىق بيۋدجەتتىڭ اتقارىلۋى تۋرالى ەسەپ تالقىلانعاننان كەيىن جۋرناليستەرگە بەرگەن سۇحباتىندا ق ر قارجى ءمينيسترى باقىت سۇلتانوۆ ءمالىم ەتتى.

«قازىرگى تاڭدا اتالعان ماسەلەنىڭ جوبالىق-سمەتالىق قۇجاتتاماسىن ازىرلەۋ ءجۇرىپ جاتىر. وسىعان قاتىستى ءالى دە بىردەڭە ايتۋ ەرتەرەك. سوعان قاراعاندا، بۇل تەك ساراپتامالىق باعالاۋ عانا، ءبىز ءالى قۇجاتتامانى قاراعان ەمەسپىز»، - دەدى ب. سۇلتانوۆ.

ونىڭ ايتۋىنشا، بۇل ماسەلە استانا قالالىق اكىمدىگىندە تالقىلانعان بولۋى مۇمكىن، الايدا مينيسترلىككە پانتەون قۇرىلىسىنىڭ قۇنى كورسەتىلگەن قۇجاتتار كەلىپ تۇسپەگەن.

ايتا كەتسەك، بۇعان دەيىن ءبىرقاتار ب ا ق استانا قالالىق اكىمدىگىنە سىلتەمە جاساپ، وندا ۇلتتىق پانتەون قۇرىلىسىنىڭ تەحنيكالىق- ەكونوميكالىق نەگىزدەمەلىك قۇنى 79 ميلليارد تەڭگە قۇرايتىنى تۋرالى اقپاراتتار ايتىلعان ەدى.

اۆتور: قانات مامەتقازى ۇلى