قازاقستان ءۇندىستانعا ۋران جەتكىزۋىن قايتا جانداندىرادى

استانا. قازاقپارات - قازاقستان ءۇندىستانعا ۋران جەتكىزۋىن قايتا جانداندىرادى. بۇل تۋرالى بۇگىن قازاقستان- ءۇندىستان ىسكەرلىك كەڭەسىنىڭ ءبىرىنشى وتىرىسى اياسىندا بەلگىلى بولدى.

«تاۋار اينالىمى ساندىق ماندە بۇرىنعى كولەمدە قالىپ، ءتىپتى ءوسىم كورسەتكەنىمەن اقشالاي تۇردە قۇلدىرادى. بىرىنشىدەن، بۇل قازاقستاننان جەتكىزىلگەن ءبىرقاتار ءونىمنىڭ قۇنى قۇلدىرادى. ەكىنشىدەن، ۋران جەتكىزۋ بويىنشا كەلىسىمشارت توقتاتىلدى. دەگەنمەن، ول قازىر قايتا جانداندىرىلدى. ءبىز بۇگىنگى كۇنى بۇل باعىتتاعى ءۇندىستاننىڭ نەگىزگى سەرىكتەسىمىز»، - دەدى كەڭەس الدىندا ب ا ق وكىلدەرىنە سۇحبات بەرگەن قازاقستاننىڭ ءۇندىستانداعى توتەنشە جانە وكىلەتتى ەلشىسى بولات سارسەنبايەۆ.

ونىڭ اتاپ وتۋىنشە، داعدارىس كەزىندە ەكى ەلدىڭ اراسىنداعى تاۋار اينالىمى ءبىرشاما قۇلدىراعان. داعدارىسقا دەيىن اينالىم كولەمى 1 ميلليارد 200 ميلليون دوللارعا تەڭ بولعان. ونىڭ نەگىزگى بولىگىن، ياعني، 1 ميلليارد دوللارىن قازاقستان ەكسپورتى قۇرادى. مۇندا ۋران ەكسپورتىنىڭ كولەمى باسىم ەدى. ءبىراق، 2014-جىلى ءۇندىستانعا ۋران جەتكىزۋ كەلىسىمشارتىنىڭ مەرزىمى اياقتالدى.

«ءبىز وتكەن جىلى پرەمەر-مينيستر نارەندرا موديدىڭ قازاقستانعا ساپارى بارىسىندا ۋران جەتكىزۋدىڭ جاڭا كەزەڭىنە كەلىسىمشارت جاساستىق. وسى جىلدان باستاپ ءبىزدىڭ ۋران تاعى دا جەتكىزىلە باستايدى»، - دەدى ەلشى.

اۆتور: مارلان جيەمباي