استانادا ماسالارمەن كۇرەس باستالدى

استانا. قازاقپارات - قالادا كۇن جىلىنعاندا شىبىن-شىركەيمەن كۇرەس باستالادى.

ءساۋىر ايىنىڭ ورتاسىندا ءۇش اۋداندا دا ماسالاردى جويۋ جۇمىستارى قولعا الىندى.

وسى كۇنگە دەيىن قالادا 26 مىڭ گەكتاردان استام جەر مەن ساياز سۋدىڭ 3,5 مىڭ گەكتاردان ارتىق اۋماعى وڭدەلدى.

قالادا زالالسىزداندىرۋ جۇمىستارىنا 187 جۇمىسكەردەن تۇراتىن 10 بريگادا تارتىلعان، دەپ حابارلادى astana.gov.kz.

قازىرگى كەزدە استانا قالاسىنىڭ «الماتى» اۋدانى بويىنشا 6 مىڭ گەكتارعا جۋىق اۋماق، اۋدانى 603,5 گەكتار ساياز سۋ وڭدەلدى؛ سارى ارقا اۋدانىندا 4 مىڭ گەكتارعا جۋىق اۋماق پەن اۋدانى 1518 گەكتار باتپاق جەر وڭدەلدى؛ «ەسىل» اۋدانىندا وڭدەلگەن اۋماق 1050,45 گەكتاردى قۇرادى، ال وزەن اۋدانى - 1491 گەكتار. ماسالارمەن كۇرەسۋ ءۇشىن قۇرامىنا سيپەرمەترين جانە حلورپەريفوس كىرەتىن پرەپاراتتار پايدالانىلادى. 1 گەكتار جەرگە زالالسىزداندىراتىن زاتتىڭ 0,350 ليتر مولشەرى جۇمسالادى.

ۇستىمىزدەگى جىلدىڭ ءساۋىر ايىنىڭ سوڭىندا سۋ قويمالارىن وڭدەۋدىڭ ءبىرىنشى كەزەڭى اياقتالدى. ءتيىستى جۇمىستار الاش جانە قاراعاندى تاسجولدارىنىڭ بويىندا، ميچۋرينو، ينتەرناتسيونالنىي، پرومىشلەننىي كەنتتەرىندەگى وزەندەردە، تەلمان، شۇبار، پريگورودنىي، زارەچنىي، ۇركەر، شىعىس يلينكا تۇرعىن الاپتارىندا جۇرگىزىلدى. سارىبۇلاقتىڭ بويى جانە ەسىل وزەنىنىڭ جاعاسى، تالدىكول ماڭى دا تىس قالعان جوق. قازىرگى كەزدە ماسالاردىڭ ۇشۋىن بولدىرماۋ ءۇشىن باتپاق جەرلەر مەن تاياز وزەندەردى تەكسەرۋ جۇمىستارى قولعا الىندى.

استانانىڭ ءۇش اۋدانىندا اشىق اۋماقتار ماسالاردان قورعايتىن بارەرمەن وڭدەلدى. ايتا كەتەيىك، اشىق اۋماقتاردا دەراتيزاتسيا - كەمىرگىشتەردى جويۋ جۇمىستارى دا جۇرگىزىلىپ جاتىر. بۇگىندە قالا اۋماعىندا «نۇرا- ەسىل» كانالى، تالدىكول سۋ جيناعىشى جانە ونىڭ ماڭىنداعى سۋ قويمالارى، استانا مەن قالانىڭ اينالاسىنداعى وزەندەر وڭدەلدى.