قاراعاندىدا شەرتپە كۇيشىلەر سايىسى ءوتتى
اققىز (مۇگىلسىم) احمەت قىزىنىڭ مۇراسىن زەرتتەۋشى جانە كۇيلەرىن ناسيحاتتاۋشى تاكىشوۆ بولات جۇماتاي ۇلى مەن «سارىارقا دارىنى» ايماقتىق عىلىمي- پراكتيكالىق ورتالىعى ۇيىمداستىرعان بۇل ونەر سايىسى قاراعاندى وبلىسىنىڭ بالالار ونەر مەكتەپتەرى، بالالار مۋزىكا مەكتەپتەرى وقۋشىلارىنىڭ جانە ونەر كوللەدجى ستۋدەنتتەرىنىڭ قاتىسۋىمەن ءوتتى.
ايتا كەتكەن ءجون، بايقاۋعا ق ر ەڭبەك سىڭىرگەن ءارتىسى، كۇيشى-كومپوزيتور، گۋمانيتارلىق عىلىمدار اكادەمياسىنىڭ اكادەميگى تۇرىسبەك سەكەن كارىم ۇلى باستاعان ق ر ەڭبەك سىڭىرگەن قايراتكەرى، «قۇرمەت» وردەنىنىڭ يەگەرى، ونەر مۋزىكا زەرتتەۋشىسى، شاكارىم جارقىن جاقيا ۇلى، ق ر ەڭبەك سىڭىرگەن قايراتكەرى، قازاق ۇلتتىق ونەر ۋنيۆەرسيتەتىنىڭ پروفەسسورى، ءجۇزباي جانعالي ءالىمحان ۇلى، اققىز مۇراسىن زەرتتەۋشى، كۇيشى، تاكىشوۆ بولات جۇماتاي ۇلى، مادەنيەت سالاسىنىڭ ۇزدىگى، مامانداندىرىلعان مۋزىكا مەكتەپ- ينتەرناتىنىڭ ۇستازى، سارسەمبەكوۆ جەڭىس دايىر ۇلى قازىلىق ەتتى.
بايقاۋدىڭ باستى ماقساتى - شەرتپە كۇيشى اققىز (مۇگىلسىم) احمەت قىزى كۇيلەرى مەن شىعارماشىلىعىن جاس بۋىنعا دارىپتەۋ، بالالار جانە جاسوسپىرىمدەر شىعارماشىلىعىنىڭ مادەنيەتىن دامىتۋ.
اققىزدىڭ بۇگىنگى كۇنى 9 كۇيى ورىندالىپ ءجۇر، 8 كۇيى نوتاعا ءتۇستى، 4 ولەڭى بار، بىرەۋىن «امان بول امال قانشا» ءانىن بەلگىلى ءانشى ماناربەك ەرجانوۆ ورىنداعان. كونكۋرستا 7 كۇيى ورىندالدى. كونكۋرس «كەنشىلەر سارايى» مادەنيەت ۇيىندە قورىتىندىلانىپ، ارتىنان گالا كونتسەرتتە كونكۋرسانتتارمەن بىرگە كۇيشىلەر سەكەن تۇرىسبەك، جانعالي ءجۇزباي، دانيەل حامزين، قايروللا ءسادۋاقاسوۆ، گۇلنار ءشارىپوۆا كۇي شەرتىپ اقتوعاي اۋدانىنىڭ «توقىراۋىن تولقىندارى» ءان-ءبي ءانسامبلى ونەر كورسەتتى. اققىز (مۇگىلسىم) احمەت قىزىنىڭ كۇيلەرى مەن اندەرى شىرقالدى.
ەكى كۇنگە سوزىلعان سايىس قورىتىندىسىندا 12-14 جاس ارالىعى بويىنشا ءبىرىنشى ورىندى ايانا ساتانوۆا جەڭىپ الدى، وعان سىيلىققا تەلەديدار بەرىلدى.
15-17 جاس ارالىعىندا وتكەن سايىستا ەرلىك ايبول، جانسۇلتان قاۋكەنوۆ، ميراس اكىمبەك، ماديار ۋاليەۆ ديپلومانت اتاندى. ءۇشىنشى ورىندى بەكسۇلتان باراقباي يەلەندى. ەكىنشى ورىن اڭسار ىسقاقوۆقا بۇيىردى. ءبىرىنشى ورىندى دياس عابدوللا ولجالادى. ال سايىستىڭ باس جۇلدەسىن اقتوعايلىق بالجان سەرىكبول قىزى جەڭىپ الدى.
باس جۇلدەنى گران - پري 100000 تەڭگەنى ق ر پارلامەنتىنىڭ دەپۋتاتى نۇرلان دۋلاتبەكوۆ جانە ايگۇل سولوۆيەۆا تاپسىردى.
باس بايگە - گران - پري 100000 تەڭگە
ءبىر ءبىرىنشى ورىن جانە لاۋرەات اتاعى 80000 تەڭگە
ءبىر ەكىنشى ورىن جانە لاۋرەات اتاعى 60000 تەڭگە
ءبىر ءۇشىنشى ورىن جانە لاۋرەات اتاعى 50000 تەڭگە
«اققىزدىڭ كۇيىن ۇزدىك ورىنداعانى» ءۇشىن سايىسكەرگە ارنايى سىيلىق 50000 تەنگە ۇسىنىلدى.
«اققىزدىڭ كۇي مۇراسى» اتتى كۇيتاباق البوم جيناعى قازاق ۇلتتىق ونەر ۋنيۆەرسيتەتىنىڭ پروفەسسورى جانعالي ءجۇزباي ءالىمحان ۇلىنىڭ رەداكتورلىعىمەن جارىق كورىپ، تۇساۋى كەسىلدى.
