قازاقستان مەن ساۋد ارابياسى اراسىندا ەكونوميكالىق ىنتىماقتاستىقتى ارتتىرۋ كوزدەلەدى - ءماجىلىس

استانا. قازاقپارات - بۇگىن پارلامەنت ءماجىلىسىنىڭ جالپى وتىرىسىندا پالاتا دەپۋتاتتارى «ق ر ۇكىمەتى مەن ساۋد ارابياسى كورولدىگىنىڭ ۇكىمەتى اراسىنداعى تابىسقا سالىناتىن سالىقتارعا قاتىستى قوسارلانعان سالىق سالۋدى بولدىرماۋ جانە سالىق سالۋعا جول بەرمەۋ تۋرالى كونۆەنسيانى جانە وعان حاتتامانى راتيفيكاتسيالاۋ تۋرالى» زاڭ جوباسىن ماقۇلدادى.

 حاتتاماعا 2011 -جىلدىڭ 7 - ماۋسىمىندا قول قويىلعان.

قۇجاتتىڭ ماقساتى ينۆەستيتسيالار ءۇشىن قولايلى جاعدايلار جاساۋ جولىمەن قازاقستان مەن ساۋد ارابياسى كورولدىگى اراسىنداعى ەكونوميكالىق ىنتىماقتاستىقتى نىعايتۋ جانە كەڭەيتۋ بولىپ تابىلادى. كونۆەنتسيا ۋاعدالاسۋشى مەملەكەتتەردىڭ بىرەۋىنىڭ نەمەسە ەكەۋىنىڭ دە رەزيدەنتتەرى بولىپ تابىلاتىن تۇلعالارعا قولدانىلادى.

 «كونۆەنتسيا ەكى مەملەكەتتەگى زاڭدى جانە جەكە تۇلعالارعا قوسارلانعان سالىق سالۋدى جويۋعا مۇمكىندىك بەرەدى. سالىق تولەۋشىگە ءبىر رەت، ياعني ۋاعدالاسۋشى مەملەكەتتەردىڭ بىرىندە عانا سالىق تولەۋ ءراسىمى بەكىتىلەدى. ال ارىپتەس مەملەكەت سالىقتىڭ تولەنگەن سوماسىن ەسەپكە جاتقىزادى. ەكىنشىدەن، ينۆەستيتسيالار ءۇشىن قولايلى جاعدايلار جاساۋ ارقىلى قازاقستان مەن ساۋد ارابياسى اراسىنداعى ەكونوميكالىق ىنتىماقتاستىقتى نىعايتۋعا جول اشادى. ۇشىنشىدەن، مەملەكەتتەردىڭ قۇزىرەتتى ورگاندارى اراسىندا سالىق ماسەلەلەرى بويىنشا اقپارات الماسۋ ارقىلى سالىقتان جالتارۋدان بولدىرماۋ ماسەلەسى رەتتەلەدى»، دەدى قارجى ءمينيسترى باقىت سۇلتانوۆ.

ايتا كەتەرلىگى، كونۆەنتسيادا قولدانىلاتىن سالىقتار قازاقستان رەسپۋبليكاسىندا كورپوراتيۆتىك تابىس سالىعى، ال ساۋد ارابياسىندا زەكەت بولىپ تابىلادى. بۇدان بولەك، تابيعي گازدىڭ ينۆەستيتسيالىق سالىعىن قامتيتىن تابىس سالىعى دا ەنىپ وتىر.

ءماجىلىس ماقۇلداعان زاڭ جوباسى پارلامەنت سەناتىنا جولدانادى.

اۆتور: قانات مامەتقازى ۇلى