عالىمدار ورىك ءدانىن جەۋ وتە قاۋىپتى بولۋى مۇمكىن ەكەنىن ايتادى

استانا. قازاقپارات - كەپتىرىلگەن ورىك ءدانى كوپتەگەن ەلدەردە داستارقان ءسانىن كەلتىرەتىنى راس.

الايدا جۋىردا بريتانيا عالىمدارى ونىڭ قۇرامىنداعى قۇنارلى زاتتار مەن دارۋمەندەرگە (اتاپ ايتساق، B17 دارۋمەنى) قىزىقپاۋعا كەڭەس بەردى.

سويتسە، ماسەلە ءداننىڭ قۇرامىندا كوپ مولشەردە بولاتىن ۋلى زات تسيانيدتە ەكەن. سوڭعى كەزدە بريتانيادا ورىكتىڭ ۇنتاقتالعان داندەرىنەن جاسالعان تاماق قوسپالارى وڭدى-سولدى ساتىلۋدا. ۇنتاقتى وندىرۋشىلەر ونى وبىر دەرتىنە قارسى كەرەمەت شيپا دەپ، بارىنشا جارنامالاپ جاتىر.

ءبىراق، بۇل قوسپانىڭ تيىمدىلىگى دالەلدەنگەن جوق جانە ونى تۇراقتى تۇردە قولدانۋ دەنساۋلىققا زور نۇقسان كەلتىرىپ، ءتىپتى ادام ءولىپ كەتۋى دە مۇمكىن ەكەن. سەبەبى تسيانيد ادامزات تاريحىنداعى ەڭ كۇشتى ۋلاردىڭ ءبىرى بولىپ تابىلادى. مىسالى، ەگەر ادام ورىكتىڭ 10-15 ءدانىن جەسە، اياق-قولدارى ۇيىپ، جانسىزدانىپ قالادى. ال ەگەر وسىنداي وتىزعا جۋىق ءداندى جەسە، وندا ادام ءتىل تارتپاستان بىردەن كوز جۇمۋى مۇمكىن ەكەن.

Stan.kz