تەلەارنا «حابار» اگەنتتىگىنە جاڭا باسشى تاعايىندالدى

 استانا. قازاقپارات - « حابار» اگەنتتىگى» ا ق باسقارما ءتورايىمى لاۋازىمىنا باسقارما ءتوراعاسىنىڭ ءبىرىنشى ورىنباسارى قىزمەتىن اتقارىپ كەلگەن الماگۇل احمەتجانوۆا تاعايىندالعاندىعىن « حابار» اگەنتتىگى حابارلايدى.

 2016 - جىلعى 18 - مامىر كۇنى قازاقستان رەسپۋبليكاسى اقپارات جانە كوممۋنيكاتسيالار ءمينيسترى داۋرەن ابايەۆ « حابار» اگەنتتىگى» ا ق ۇجىمىنا جاڭا باسشىنى تانىستىردى.

الماگۇل احمەتجانوۆا 2016 - جىلعى 16 - مامىردا مەملەكەت باسشىسىنىڭ وكىمىمەن ق ر پرەزيدەنتىنىڭ باسپا ءسوز حاتشىسى بولىپ تاعايىندالعان ايدوس ۇكىبايدىڭ لاۋازىمىنا ورنالاسادى.

الماگۇل اۋعالي قىزى احمەتجانوۆا 1975 - جىلعى 4 - جەلتوقساندا الماتى قالاسىندا دۇنيەگە كەلگەن. قازمۇۋ 1998 - جىلى « الەۋمەت تانۋ» ماماندىعى بويىنشا ءتامامداعان. ماگيستر دارەجەسى بار.

 الماگۇل احمەتجانوۆا اگەنتتىكتەگى ءوز ەڭبەك جولىن 1999 - جىلى رەداكتور جانە پروديۋسەر لاۋازىمىندا باستادى. 2002 - 2004 - جىلدارى باعدارلامالار ديرەكسياسىنىڭ جەتەكشىسى، 2005 - 2011 - جىلدارى باعدارلامالار ديرەكسياسىنىڭ ديرەكتورى، 2012 - جىلدان باستاپ كۇنى بۇگىنگە دەيىن - باسقارما ءتوراعاسىنىڭ ءبىرىنشى ورىنباسارى لاۋازىمىندا قىزمەت ەتتى.

« حابار» اگەنتتىگى» ا ق - مەديا حولدينگى 1995 - جىلى قۇرىلدى جانە قازاقستاندا جانە شەت ەلدە قازاق، ورىس جانە اعىلشىن تىلدەرىندە حابار تاراتاتىن « حابار» ارناسى، جەرسەرىكتىك ارنا «Kazakh TV»، تاۋلىك بويى اقپارات تاراتاتىن ارنا «24 KZ» جانە مادەني- اعارتۋشىلىق ارنا « ءبىلىم جانە مادەنيەت» اتتى ءتورت ارنادان تۇرادى.