قازاقستاندىق بوكسشىلار ريو وليمپياداسىندا ءبىر مەدالدان الۋعا قاۋقارلى - ن. اقۇرپەكوۆ

تاراز. قازاقپارات - جامبىل وبلىسىنىڭ تۋماسى، «استانا ارلانس» كاسىبي كومانداسىنىڭ باس باپكەرى نۇرلان اقۇرپەكوۆ ريو-دە-جانەيرو قالاسىنداعى وليمپيادا ويىندارىنداعى قازاقستان قۇراماسىنىڭ مۇمكىندىگىن جوعارى باعالاپ وتىر.

«كوماندامىز ءار مەدالدىڭ ءار تۇرىنەن الا الادى، - دەدى ن. اقۇرپەكوۆ. - الايدا بۇدان دا جاقسى كورسەتكىشكە ۇمىتتەنىپ وتىرمىز».

ن. اقۇرپەكوۆ ريو ويىندارىنا ليتسەنزيانى تاجىريبەلى قازاقستاندىق سپورتشىلار ۇتىپ العانىن اتاپ ءوتتى.

«ولاردىڭ قاتارىندا جامبىلدىق سپورتشى ولجاس ساتتىبايەۆتىڭ بولعانى دا قۋانتادى. ونىڭ ماراپاتقا يە بولۋ مۇمكىندىگى بار دەپ ويلايمىن»، - دەدى ول.

ن. اقۇرپەكوۆ 26-27- مامىردا لوندوندا WBS بۇكىل الەمدىك بوكس سەرياسى اياسىندا وتەتىن «استانا ارلانستىڭ» بريتانيالىق كوماندامەن جارتىلاي فينالدىق كەزدەسۋى جايلى ايتتى. قازىر شىمكەنتتە وعان دايىندالىپ جاتىر.

«جەڭىل سالماق دارەجەسىندە باسىمدىق ءبىزدىڭ جاقتا بولسا، اۋىر سالماق دارەجەلەرىندە قارسىلاستىڭ مىعى باسىم. كەزدەسۋ ون سالماق دارەجەسى بويىنشا وتەدى. ءبىزدىڭ كلۋبقا ءتورت جامبىلدىق سپورتشى جانبولات قىدىربايەۆ، اسلانبەك شىمبەرگەنوۆ، امانقۇل ءابىلحان مەن نۇرسۇلتان امانجولوۆ تارتىلدى. ءار سالماقتا مىقتى سپورتشىلارىمىز بار»، - دەدى قۇرامانىڭ باس باپكەرى.

ەسكە سالا كەتەيىك قازاقستاندىق بوكس فەدەراتسياسىنىڭ اقپاراتىنشا، بوكستان ەرلەر كومانداسى تولىق قۇرامدا وليمپيادا ويىندارىنا العاش رەت قاتىسىپ وتىر.

ريودا قازاقستان نامىسىن 10 سپورتشى - ولجاس ساتتىبايەۆ، قايرات ەراليەۆ، ابىلايحان ءجۇسىپوۆ، جانىبەك ءالىمحان ۇلى، ادىلبەك نيازىمبەتوۆ، يۆان دىچكو، دانيار ەلەۋسىنوۆ، ۆاسيلي لەۆيت، ءبىرجان جاقىپوۆ، بەرىك ءابدىراحمانوۆ قورعايدى.