مينيسترلىكتەر زاڭنامالىق قامتاماسىز ەتۋ قىزمەتىن باسەكەلەستىك ورتاعا بەرۋگە نارازى

استانا. قازاقپارات - مينيسترلىكتەر زاڭنامالىق قامتاماسىز ەتۋ قىزمەتىن باسەكەلەستىك ورتاعا بەرۋگە نارازى.

بۇل تۋرالى بۇگىن قر پارلامەنتى ماجىلىسىندەگى «نۇر وتان» پارتياسى فراكسياسى جەتەكشىسىنىڭ ورىنباسارى اسقار بازاربايەۆ ءمالىم ەتتى.

«ءبىز الدىن الا ءتىزىمدى تەك ماۋسىمدا عانا تۇگەندەۋ قورىتىندىسى بويىنشا، ال بازالىق ءتىزىمدى كۇزدە بەرەمىز. وندا تەك قانا عيماراتتى تازالاۋعا بايلانىستى قىزمەتتەردىڭ بولمايتىندىعى انىق. دەگەنمەن، ونداي دا قىزمەت توبىنىڭ بار ەكەندىگى بەلگىلى»، - دەدى ول.

ا. بازاربايەۆتىڭ ايتۋىنشا، ەىدۇ ەلدەرىندە زاڭنامالىق قامتاماسىز ەتۋمەن بايلانىستى قىزمەتتەر دە باسەكەلەستىك ورتاعا بەرىلگەن. «ال مەنىڭ بىلۋىمشە، الدىن الا تالقىلاۋ بارىسىندا ءبىزدىڭ مينيسترلىكتەردىڭ ماماندارى زاڭنامالىق قامتاماسىز ەتۋ قىزمەتىن باسەكەلەستىك ورتاعا بەرۋگە قارسىلىق تانىتتى»، - دەدى فراكسيا جەتەكشىسىنىڭ ورىنباسارى.

سونىمەن بىرگە ول تالقىلاۋ بارىسىندا باسەكەلەستىك ورتاعا بەرىلەتىن قىزمەتتەردىڭ ناقتى ءتىزىلىمى تۇزىلەتىندىگىن باسا ايتتى.

«ازىرشە، ونىڭ قانشا پايىز ەكەندىگىن ايتا المايمىز. ويتكەنى، بىزدە قورىتىندى كورسەتكىش جوق. بىزدە شامامەن مينيسترلىكتەردىڭ 4,5 مىڭ قىزمەتىنىڭ ءتىزىمى بار. بۇل تەك ولاردىڭ ەرەجەلەرىن زەردەلەۋدىڭ نەگىزىندە الىنعان دەرەكتەر. ساراپتاما مينيسترلىكتەردە قانشا قىزمەت بار ەكەندىگىن كورسەتەدى»، - دەدى ا. بازاربايەۆ.

اۆتور: مارلان جيەمباي