قانات يسلام: گ. گولوۆكين ەكەۋمىزگە دە قازاقتىڭ كوك تۋىنىڭ جىعىلماعانى قىمبات
جۋرناليستەردىڭ قويعان كوپتەگەن سۇراقتارىنىڭ ءبىرى - گەننادي گولوۆكين ەكەۋىنىڭ اراسىندا بولۋى مۇمكىن جەكپە-جەك ەدى. قانات ءوز جاۋابىندا بۇل ماسەلەگە ءبىرجولا نۇكتە قويدى. ياعني، قانات يسلام مەن گەنناديي گولوۆكين ءبىر-بىرىنە قارسى شارشى الاڭعا شىقپايدى.
«گەنا دا قازاق، مەن دە قازاق. ەكەۋمىزگە دە ءبىر- بىرىمىزبەن جۇدىرىقتاسقانىمىز ەمەس، قازاقتىڭ كوك تۋىنىڭ جەلبىرەگەنى، ابىرويىنىڭ اسقاقتاعانى قىمبات. مەن گەنانى جاسى ۇلكەن اعا رەتىندە، قازاقتىڭ تۋىن كوتەرگەن باتىرى رەتىندە سىيلايمىن. ول تۋى جىعىلماي، تاۋى شاعىلماي الدىمىزدا جۇرسە، مەن سول تۋدىڭ جىعىلماۋىنا جاراپ جاتسام، مەنەن اسقان باقىتتى ادام جوق» ، - دەدى قانات يسلام.
ال «ءبىر جەكپە-جەگىڭىز ءۇشىن قانشا اقشا الاسىز؟»، - دەگەن سۇراققا قانات جىميىپ، وسى كەزدەسۋلەرى ءۇشىن ءالى سىياقى الىپ كورمەگەنىن اشىق ايتتى.
«مەن شىنىن ايتقاندا وسى وتكىزگەن كەزدەسۋلەرىمنىڭ ەشبىرىندە سىياقى الىپ كورمەدىم. ويتكەنى، مەن ول جاقتا سىياقى الۋ ءۇشىن جۇرگەن جوقپىن. مەنىمەن كىم شىققىسى كەلەدى، سونىمەن شىعىپ ءجۇرمىن. «ال، ماعان اقشا بەرمەسەڭدەر مەن شىقپايمىن»، - دەپ جۇرسەم، كۇنى بۇگىنگە دەيىن 21 ەمەس، مۇمكىن 5 اق كەزدەسۋ وتكىزۋىم مۇمكىن ەدى. مەنىڭ وسى جەكپە-جەكتەرىمنىڭ بارلىعىنا باۋىرجان اعام (رەد. وسپانوۆ) ميلليونداعان قارجىسىن ءبولىپ جاتىر. نە ءۇشىن؟ ەكەۋمىزدە دە ءبىر عانا يدەيا، ءبىر عانا ماقسات بار. بۇل جەكە باستىڭ قامى ەمەس. بۇل جەردە بىزگە قازاقتىڭ كوك تۋى مەن اتاق-ابىرويى قىمبات بولىپ تۇر. دۇنيە - قولدىڭ كىرى، شىنىن، ايتقاندا. سول ءۇشىن، ءدال قازىر، ءبىزدىڭ جاس مەملەكەت ءۇشىن، ءبىز سەكىلدى جاستاردىڭ ەل نامىسىن قورعاۋى قىمبات دەپ ويلايمىن»، - دەدى ق. يسلام.
اۆتور: ايبوتا جاپپاربەرگەن
