قانات يسلام: مەن ەلىمنىڭ قولداۋىن ءاربىر سايىس بارىسىندا سەزەمىن - كەسكىن

الماتى. قازاقپارات - مەن ەلىمنىڭ قولداۋىن ءاربىر سايىس بارىسىندا سەزەمىن.

سول ءۇشىن ەلىمە ريزامىن! بۇگىن ا ق ش- تان الماتىعا ۇشىپ كەلگەن قازاقستاندىق كاسىپقوي بوكسشى قانات يسلام جۋرناليستەرگە بەرگەن سۇحباتىندا وسىلاي دەدى.

«مەن ءار كەز سايىسقا شىققاندا، ونى تەلەديداردان كورسەتسىن-كورسەتپەسىن، ارتىمدا قازاق دەگەن ۇلتىمنىڭ تاقىمىن قىسىپ وتىراتىنىن جۇرەگىممەن سەزەمىن. حالقىمنىڭ قاتتى تەبىرەنىپ، مەنىڭ كىشكەنتاي بولسىن، ۇلكەن بولسىن، ءار جولعى سايىسىما كوڭىل ءبولىپ وتىراتىندىعىن بىلەمىن. سوندىقتان، بۇل جەڭىسىمدى دە سول حالقىم قولداعان جەڭىستەرىمنىڭ قاتارىنا جاتقىزامىن»، - دەدى قانات يسلام.

سونىمەن قاتار، ول كولۋمبيالىق بوكسشى حۋان دە انحەلمەن بولعان جەكپە-جەككە تىڭعىلىقتى دايىندالعاندىعىن ايتتى.

«ول وڭاي قارسىلاس ەمەس ەدى. ونىڭ دا وزىنە ءتان جەتىستىكتەرى بار. ول ءىرى، مەنەن كۇشتىلەۋ جىگىت. سوندىقتان، سالعان جەردەن سوققىلاسپاي، ءالىپتىڭ ارتىن باعىپ، ونى كوپ جۇرگىزىپ، شارشاتۋدى ۇيعاردىق. نەگىزى قاتتى سوققىلار جاساۋدى التىنشى- جەتىنشى راۋندقا جوسپارلاعان ەدىك»، - دەدى ق. يسلام.

بۇدان باسقا، ول وسى جەڭىسىنىڭ ۇلكەن الەمدىك دودالارعا جول اشىپ جاتقاندىعىن اتاپ ءوتتى.

«قازىر ماعان ءار ءتۇرلى تۇجىرىمدار بويىنشا الەم چەمپيونى اتاعىنا تالاسۋعا ۇسىنىستار ءتۇسىپ جاتىر. اللا بۇيىرسا، ەندى سول دودالاردىڭ بىرىنە دايىندالۋىمىز كەرەك. ال الداعى جىلدارى ەڭ ماڭىزدى سايىستارىمنىڭ ءبىرىن قازاقستاندا وتكىزگىم كەلەدى»، - دەدى ق. يسلام.

اۆتور: ايبوتا جاپپاربەرگەن