بالالىق شاققا ءبىر ساياحات نەمەسە اتاقتى «مەنىڭ اتىم - قوجا» فيلمىنىڭ اكتەرلەرى - فوتو، كەسكىن

استانا. قازاقپارات - حيكاياتتارعا تولى، جەلىسى قىزىق وسى فيلمدى قاراپ، قانشاما بالا ەسەيدى؟!

اراگىدىك تەلەارنالاردان كورسەتىپ جاتسا، ءساتتى تۇسىرىلگەن تەلەتۋىندى كوزگە ىستىق كورىنەدى. قوجا، جانار، سۇلتان، جانتاس سەكىلدى كينو كەيىپكەرلەرىنىڭ داۋىستارىن ايەلدەر دۋبلياجداعان. وسى كەزگە دەيىن بىلمەپپىن. ءبىر قاراعاندا، قارلىققان داۋىس ايەل داۋىسى ەكەنى دە اڭدالمايدى. قالاي ايتقاندا دا «مەنىڭ اتىم - قوجا» بالالار كوركەم فيلمىنىڭ ەڭ ۇزدىك تۋىندىسى. كەڭەستىك داۋىردە تۇسىرىلگەن بۇنداي تۋىندى ودان كەيىن قايتالانعان ەمەس. تەحنيكالىق تۇرعىدا قازىر دامىپ كەتكەنىمەن، مازمۇندىق جاعىنان «ءجىبى ءتۇزۋ»، بالالار وتىرا قالىپ قارايتىن وتاندىق فيلم جوقتىڭ قاسى. جاناردى ۇناتقان قوجا، سىنىپتاس قىزىنىڭ كوڭىلىن اۋلاۋ ءۇشىن ءارقيلى ارەكەتكە باردى. بالالىق ماحاببات تا بار، شالالىق تا بار. قوجا ۇنەمى داۋسى بيازى، ۇزىگە سويلەپ تۇراتىن جانار ءۇشىن قاباعان ءيتتىڭ جانىنان وتۋگە دە، مياۋلاۋعا دا ءازىر بولدى. جانار ءرولىن گۇلنار قارابايەۆا وينادى.

-  ءساتى سولاي بولدى. قۇربىمنىڭ ۇيىندە قوناقتا وتىرعانمىن. ونىڭ اناسى -  كينەماتوگرافيست. ءوزىمنىڭ ەرەسەك ويلارىممەن، سوزدەرىممەن ونى ابدەن كۇلدىردىم. فيلمگە ۇلگىلى قىز بالا كەرەك دەگەندە قۇربىم «مەندە ونداي قىز بار» دەپتى. كەيىن كينوسىناق، فوتوسىناققا شاقىردى، -  دەيدى ول. فيلم ءتۇسىرىلىپ جاتقاندا گۇلنار ءۇشىنشى سىنىپتى اياقتاعان. ول «كينودا ويناعان كەيىپكەرىم سياقتى ومىردە دە ۇلگىلى وقۋشى بولدىم» دەيدى. كەيىپكەرمەن تيپاجى ۇيلەسە كەتكەن. ول كەيىن ينستيتۋتتى ءبىتىرىپ، ينجەنەر بولدى. قوجانىڭ ءرولىن ويناعان نۇرلان سانجار (كينوعا تۇسكەن كەزدە -  نۇرلان سەگىزبايەۆ، فۋتبولشى تيمۋر سەگىزبايەۆتىڭ تۋعان ءىنىسى) بالالىق شاقتاعى ءومىرى كەيىپكەرىنە ۇقساعان.

-  كينوعا تۇسەمىن دەپ مەكتەپتە ەكىنشى جىلعا قالىپ قويدىم. ىشىندە بولاشاق وپەرا ءانشىسى الىبەك دىنىشەۆ، قازاقستان ستراتەگيالىق زەرتتەۋلەر ينستيتۋتىنىڭ بولاشاق ديرەكتورى بولات سۇلتانوۆ بار كلاستاستارىمنان ءبىر سىنىپ قالىپ قويعانىما وكىنەتىنمىن، -  دەدى تانىمال اكتەر.

www.bmtv.kz