قازاقستاندا كورنەكتى تاتار اقىنىنا ەسكەرتكىش قويىلدى

استانا. قازاقپارات - اتاقتى تاتار اقىنى، ءتۇبى ءبىر تۇركىنىڭ ماقتانىشى - عابدوللا توقايعا ارناپ سەمەي قالاسىندا ەسكەرتكىش ورناتىلدى.

بۇل تۋرالى تۇركى اكادەمياسىنىڭ باسپا ءسوز قىزمەتى حابارلادى.

بۇل شارا قازاقستان رەسپۋبليكاسىنىڭ تاۋەلسىزدىگىنە 25 جىل تولۋى مەن اقىننىڭ بيىلعى 130  جىلدىق مەرەيتويىنا ورايلاستىرىلىپ وتىر.

ەسكەرتكىشتىڭ اشىلۋ سالتاناتىنا سەمەي قالاسىنىڭ اكىمى ە. ساليموۆ، رەسەي فەدەراتسياسىنىڭ قازاقستانداعى باس كونسۋلى س. اننەنكوۆ، سونداي- اق بۇكىل الەمدىك تاتارلار كونگرەسىنىڭ جەتەكشىلەرى مەن زيالى قاۋىم وكىلدەرى قاتىستى.

ايتا كەتۋ كەرەك، تۇركى اكادەمياسى حالىقارالىق ۇيىمى (TWESCO) نەبارى 26 جىل ءومىر ءسۇرىپ، قۇندى مۇرا قالدىرعان، ادەبي تاتار ءتىلىنىڭ نەگىزىن قالاۋشى اقىننىڭ مەرەيتويىنا ارناپ ءبىرقاتار شارالار ۇيىمداستىردى. اتاپ ايتقاندا، TWESCO مەن تاتارستان رەسپۋبليكاسى عىلىم اكادەمياسى بىرلەسىپ، 25 -ساۋىردە قازان قالاسىندا «عابدوللا توقاي جانە تۇركى دۇنيەسى» اتتى حالىقارالىق كونفەرەنسيا وتكىزدى. سونىمەن قاتار، اقىننىڭ شىعارماشىلىعىنا ارنالعان 2 كىتاپتى: قازاق جانە تاتار تىلدەرىندەگى «عابدوللا توقاي. ولەڭدەرى» جانە «تۇعىرلى تۇلعالار» سەرياسىمەن شىققان «عابدوللا توقاي تاعىلىمى» اتتى ماقالالار جيناعىن جاريالاپ باسقان بولاتىن.