12:04, 17 - مامىر 2016 | GMT +5
قازالىدا بەگىم انا ەسكەرتكىشى بوي كوتەرمەك
قىزىلوردا. قازاقپارات - قازالى اۋدانىنىڭ ساۋلەتتىك كەلبەتىن جاقسارتۋ ماقساتىندا ايتەكە بي كەنتىن اباتتاندىرۋ جوباسى ازىرلەنگەن بولاتىن. جوبادا كەنتتىڭ بىرنەشە ورتالىق كوشەلەرىن اباتتاندىرۋ جۇمىستارى قاراستىرىلعان. سونىڭ ءبىرى - ق. ءپىرىموۆ كوشەسىنە ورناتىلاتىن بەگىم انا ەسكەرتكىشى.
وسى ماسەلەگە وراي اۋدان اكىمى ناجمادين شامۇراتوۆ استانا، تاراز، اقتوبە، تۇركىستان، قىزىلوردا قالالارىنان كەلگەن بەگىم انا ۇرپاقتارىن قابىلدادى.
بەگىم انانىڭ اكەسى قارا بۋرا اۋليە قورىنىڭ پرەزيدەنتى مۇساعالي سارسەمباي ۇلى باستاعان ازاماتتار بيىلعى جىلى ورناتىلاتىن ەسكەرتكىش جوباسىمەن تانىستى.
اۋدان اكىمى ناجمادين شامۇراتوۆ ادالدىقتىڭ سيمۆولىنداي بولعان انامىزدى ون عاسىر بويى ەسىنەن شىعارماعان ەلدىڭ بۇگىنگى ۇرپاقتارى دا ۇلگى تۇتۋ قاجەتتىگىن ايتتى. ءوز ويلارىن ورتاعا سالعان انا ۇرپاقتارى اۋدان باسشىسىنا ريزاشىلىقتارىن جەتكىزدى. ايتا كەتەيىك، ەل اۋزىنداعى اڭىزدارعا سۇيەنىپ جاسالعان ەسكەرتكىشتىڭ بيىكتىگى 4، ەنى 12 مەتر بولىپ ورناتىلماق.
اۆتور : ەلۋباي اۋەزوۆ
