اسىق ويىنى تۇڭعىش رەت وقۋشىلار سپارتاكياداسى قاتارىنا ەنگىزىلدى
سپارتاكيادا شەڭبەرىندە وقۋشىلار اراسىندا وتكىزىلگەن رەسپۋبليكالىق دەڭگەيدەگى اسىق اتۋ تۋرنيرى استانا قالاسىندا ءوزىنىڭ بايراعىن كوتەردى.
جارىسقا رەسپۋبليكامىزدىڭ تۇپكىر-تۇپكىرىنەن اتىراۋ، جامبىل، اقمولا، قوستاناي، الماتى وبلىسى، ماڭعىستاۋ وبلىسى، سولتۇستىك قازاقستان وبلىستارى، استانا جانە الماتى قالالارىنان 9 كوماندادان قۇرالعان 60 قا جۋىق سپورتشى قاتىستى.
تۋرنيردىڭ اشىلۋ سالتاناتىندا ءسوز العان ق ر «اسىق اتۋ» فەدەراتسياسىنىڭ ۆيتسە-پرەزيدەنتى جومارت سابىرجانوۆ: «اسىق اتۋ جارىستارى مۇنىمەن توقتاپ قالمايدى. الداعى ماۋسىم ايىندا قازاقستان رەسپۋبليكاسىنىڭ كۋبوگى ۇيىمداستىرىلادى. سوسىن ەلوردا كۇنى قارساڭىندا ءدال وسى سپورت تۇرىنەن حالىقارالىق تۋرنير وتەدى. مىنە، بۇگىن ءبىزدىڭ جاستارىمىز سول بايراقتى باسەكەلەرگە قاتىسۋعا دايىندالىپ جاتىر»، - دەدى.
ەلىمىزدىڭ جان-جاعىنان جينالعان سپورتشى وقۋشىلار ەلوردا تورىندە وزدەرىنىڭ مەرگەندىكتەرىن، ەپتىلىكتەرىن، شاپشاڭدىقتارىن بايقاتتى.
«اسىق سەكىلدى قۇندىلىقتارىمىزدىڭ استارىندا ءبىزدىڭ تاريحىمىز جاتىر. اسىق ويىنى جاس بالالاردى مىقتىلىققا، مەرگەندىككە ۇيرەتەدى. سوندىقتان دا بۇل تۋرنيردىڭ تاريبەلىك ءمانى باسىمىراق. - دەيدى استانا قالاسى كومانداسىنىڭ جاتتىقتىرۋشىسى ەسكەندىر راحمەتوۆ.
ەكى كۇنگە سوزىلعان باسەكەنىڭ قورىتىندىسى بويىنشا، كوماندالىق ەسەپتە جامبىل وبلىسى ءبىرىنشى ورىن، استانا قالاسى ەكىنشى ورىن، قوستاناي وبلىسى ءۇشىنشى ورىن الدى.
ال جەكەلەي سىنداردا اقمولا، قوستاناي، جامبىل وبلىستارىنان كەلگەن كوماندالار وزدەرىنىڭ شەبەرلىكتەرىمەن توپتان وزدى.
