ق. قاسىموۆ كوشەدەگى قىلمىس سانىنىڭ ءوسۋ سەبەبىن ءتۇسىندىردى

استانا. قازاقپارات - كوشەدەگى قىلمىس ستاتيستيكاسىنىڭ ءوسۋى قىلمىستى تىركەۋدەگى وزگەرىستەرمەن قاتار پوليتسيا جۇمىسىنىڭ ساپالىق جاعىنان جاقسارعانىن كورسەتەدى.

بۇل تۋرالى بۇگىن ماجىلىستەگى جەرگىلىكتى پوليتسيا قىزمەتى تاقىرىبىنا ارنالعان ۇكىمەت ساعاتىندا ىشكى ىستەر ءمينيسترى قالمۇحانبەت قاسىموۆ ءمالىم ەتتى.

«وتكەن جىلى كوشەدە جاسالاتىن قىلمىستار سانى - 7 پايىزعا، قوعامدىق ورىندارداعى قىلمىستار 7 پايىزعا ارتقان. بيىلعى جىلى دا وسىنداي ۇدەرىستەر بايقالادى. الايدا، وبەكتيۆتىلىك ءۇشىن ايتا كەتەيىك. بۇل ستاتيستيكالىق كورسەتكىشتەردىڭ ءوسۋى ءبىزدىڭ كوشەلەرىمىز بەن قوعامدىق ورىندارىمىزدا قىلمىس ءورشىپ تۇر دەگەندى بىلدىرمەيدى. بۇندا قىلمىستاردىڭ تىركەلۋىنە مەملەكەتتىك قادامنىڭ وزگەرىستەرى، پوليتسيا قىزمەتىنىڭ ساپالىق جاعىنان جاقسارۋى مەن قۇقىق بۇزۋشىلىقتى اشۋدى قاعيداتتى باعالاۋ سەبەپ بولىپ وتىر»، - دەپ ءتۇسىندىردى ءى ءى م باسشىسى.

ونىڭ ايتۋىنا قاراعاندا، سوڭعى كەزدەرى جول پاترۋل پوليتسياسى قىزمەتىنىڭ ناتيجەلىلىگى ارتىپ، ولاردىڭ كومەگىمەن 14,5 مىڭنان استام قىلمىس اشىلعان.

«جالپى العاندا قابىلدانىپ جاتقان شارالار كوشە قىلمىسىنىڭ ءوسىمىن توقتاتۋعا، ۇساق قىلمىستاردى انىقتاپ، الدىن الۋعا وڭ سەرپىن بەرمەك. بۇنىڭ ءوزى قوعامدا بۇزۋشىلىقتارعا «نولدىك توزىمسىزدىك» پرينتسپتەرىن قالىپتاستىرۋعا جاردەمدەسەدى»، - دەدى ۆەدومستۆو باسشىسى.

اۆتور: قانات مامەتقازى ۇلى