الماتىدا بالالاردى دەلفيندەرمەن ەمدەۋگە ارنالعان وڭالتۋ ورتالىعى اشىلدى - فوتو
بۇل وڭالتۋ ورتالىعى الماتىداعى «نەمو» دەلفيناريەسى بازاسىندا قۇرىلعان. مۇندا ۋكراينادان كەلگەن تاجىريبەلى ماماندار جۇمىس اتقارادى.
وسى ورتالىقتاعى دەلفينوتەراپيا ءبولىمىنىڭ جەتەكشىسى الەكسەي پوليشۋك بۇل ەم- شارا سال جانە اۋتيزم دەرتىنە شالدىققان بالالارعا قولدانىلاتىندىعىن جەتكىزدى.
قارا تەڭىزدىڭ دەلفيندەرى ادامنىڭ ورتالىق جۇيكە جۇيەسىنە، يممۋندىق جانە باسقا دا زات الماسۋ ۇدەرىستەرىنە وڭ اسەر ەتەدى ەكەن.
دەلفيننىڭ قاتىسۋىمەن بولاتىن دارىستەر ەستۋ جانە سويلەۋ قابىلەتى ناشار ناۋقاستاردىڭ وسى قابىلەتتەرىن دامىتادى. ءارتۇرلى بۇلشىق ەتتەردى كۇشەيتۋ ارقىلى فيزيكالىق كۇيىن جاقسارتادى، جان كۇيزەلىسىن ازايتىپ، نيەۆرولوگيالىق جاعدايىن تىنىشتاندىرادى.
«ارينە، دەلفينوتەراپيا سۋدان جانە تەڭىز جانۋارلارىنان قورىقپايتىن بالالارعا قولدانىلادى. بۇل ەم- شارا بىرنەشە كەزەڭنەن تۇرادى. بارلىعى 10 سەانستى قۇرايدى. ءبىر كۋرس 25 مىڭ تەڭگە تۇرادى. بىزدە مىسالى، اۋتيزم دەرتىنە شالدىققان دانا ەسىمدى ءبۇلدىرشىن بولاتىن. «ماما» دەگەن سوزدەن باسقا ەشتەڭە ايتپايتىن. بىرنەشە سەانستان كەيىن ول قازىر 7 سوزگە دەيىن ايتا الادى»، - دەدى ا. پوليشۋك.
الماتى قالاسى اكىمىنىڭ ورىنباسارى ارمان قىرىقبايەۆتىڭ ايتۋىنشا، بۇگىندە قالادا ەرەكشە قاجەتتىلىكتى تالاپ ەتەتىن 7 مىڭداي بالا ءومىر سۇرەدى. ولاردىڭ ىشىندە 3 مىڭ بالا تۇزەتۋ ءبىلىم بەرۋ ۇيىمدارىندا ءدارىس الادى. «الماتى قالاسىن دامىتۋ 2020» باعدارلاماسىنا سايكەس، 2020 -جىلعا قاراي، وسىنداي بالالاردى بارىنشا تولىق قامتۋ جوسپارلانعان. سونىمەن قاتار ول، بۇگىن الماتىدا سال دەرتىنە دۋشار بولعان بالالاردى وڭالتۋ بويىنشا ءتيىستى مەموراندۋمعا قول قويىلعاندىعىن جەتكىزدى.
«دەلفينوتەراپيا شىن مانىندە وتە كۇردەلى پسيحوەموتسيالىق، پسيحوفيزيكالىق ۇدەرىستەر. ول پسيحوتەراپيالىق اسەرگە يە. دەلفيندەرمەن اينالىسقاننان كەيىن بالالاردىڭ ەستە ساقتاۋ، زەيىن قويىپ تىڭداۋ جانە ەڭبەككە دەگەن قابىلەتى ارتادى. ال جالپى، دەلفيندەردىڭ شىعاراتىن دىبىسى بالانى دامىتۋعا وتە پايدالى»، - دەدى ا. پوليشۋك.
