وتىرار، سىعاناق، ساۋران جانە سارايشىق قالالارى يۋنەسكو تىزىمىنە ەنگىزىلەدى
بۇل تۋرالى بۇگىن قازاقستان رەسپۋبليكاسىنىڭ يۋنەسكو جانە يسەسكو ىستەرى جونىندەگى ۇلتتىق كوميسسياسىنىڭ وتىرىسى باستالماي تۇرىپ، جۋرناليستەرمەن اڭگىمەلەسكەن مادەنيەت جانە سپورت ءمينيسترى ارىستانبەك مۇحامەدي ۇلى ءمالىم ەتتى.
«ب ۇ ۇ باس اسسامبلەياسىندا ءسوز العان ق ر پرەزيدەنتى نۇرسۇلتان نازاربايەۆ «دۇنيەجۇزىلىك مادەنيەتتەردى جاقىنداستىرۋدىڭ ون جىلدىعىن وتكىزۋ كەرەك» دەپ ايتقان ەدى. سوندىقتان، ءبىزدىڭ باستى ماقساتىمىز - قازاقستاننىڭ مادەنيەتى مەن كونە مۇراسىن دۇنيەجۇزىنە پاش ەتۋ. جۋىردا عانا ۇكىمەتتىڭ قاۋلىسىمەن الماتىدا مادەنيەتتى جاقىنداستىرۋ ورتالىعى اشىلدى. ەندى ورتالىققا يۋنەسكو ورتالىعى ستاتۋسىن بەرۋىمىز كەرەك. بۇل وڭاي جۇمىس ەمەس»، - دەدى ا. مۇحامەدي ۇلى.
مينيستر ءمالىم ەتكەندەي، بىلتىر ۇلى جىبەك جولىن جاڭعىرتۋ ءۇشىن قازاقستان، قىرعىزستان جانە قىتاي ەلدەرىنىڭ اۋماعىنداعى كونە قالالار يۋنەسكو-نىڭ تىزىمىنە ەنگىزىلگەن ەكەن. قازاقستاننىڭ مادەنيەت مينيسترلىگى بۇل جۇمىستى بيىل دا جالعاستىرىپ، قازاقستانداعى ءتورت كونە قالانى دۇنيەجۇزىلىك مۇرالار تىزىمىنە ەنگىزبەك ەكەن.
«بىلتىر قازاقستاننان التى قالا، قىرعىزستاننان ءۇش قالا جانە قىتايدان بىرنەشە قالا ۇلى جىبەك جولىنىڭ ءبىرىنشى تارماعىنا قوسىلدى ەندىگى ماقساتىمىز، بيىل سىرداريا بويىنداعى ءتورت قالانى، ياعني، وتىرار، سىعاناق، سارايشىق جانە ساۋران قالالارىن ۇلى جىبەك جولىنىڭ ەكىنشى تارماعى اياسىندا يۋنەسكو-نىڭ تىزىمىنە ەنگىزۋ»، - دەپ ءتۇسىندىردى مينيستر.
