رەسەيدىڭ ءىرى ساياساتكەرى قازاقستاندا تۇرىپ جاتقان ورىستارعا قازاق تىلىندە سويلەۋ كەرەكتىگىن ايتتى
دەپ حابارلايدى bnews.kz.
«ءاربىر حالىق، ۇلت، ەتنوس، ارينە، ءوز تامىرىن ساقتاپ، ءوزىنىڭ وتانىمەن بايلانىسىن ۇزبەۋى كەرەك. ءبىراق، باسقا ەلدە، قازىرگى جاعدايدا قازاقستاندا ءومىر سۇرسەك، بىرىنشىدەن، ەلدىڭ زاڭدارىن ءبىلىپ، قۇرمەتتەۋىمىز قاجەت. بۇدان بولەك، البەتتە، قازاق ءتىلىن وقۋىمىز كەرەك. حالىقارالىق قاتىناس ءتىلى سانالاتىن ورىس ءتىلىنىڭ بولعانى جاقسى. دەگەنمەن، قازاقستاندا تۇرىپ جاتقاندىقتان، قازاق ءتىلىن ءبىلىپ، قازاق تىلىندە سويلەگەن ءجون»، - دەيدى ماتۆيەنكو.
ايتا كەتەيىك، نۇرسۇلتان نازاربايەۆ ەلىمىزگە ساپارلاي كەلگەن ر ف وكىلى ۆالەنتينا ماتۆيەنكونى قابىلداعان بولاتىن. كەزدەسۋ بارىسىندا ەكى ەلدىڭ ءوزارا ىقپالداستىعى، سونىڭ ىشىندە پارلامەنتارالىق سالاداعى ءىس- قيمىلدى نىعايتۋ ماسەلەلەرى تالقىلاندى.
سونىمەن قاتار، كەزدەسۋدەن كەيىن مەملەكەت باسشىسى ۆالەنتينا ماتۆيەنكوعا قازاقستان مەن رەسەي اراسىنداعى دوستىق پەن ىنتىماقتاستىقتى نىعايتۋعا قوسقان ۇلەسى ءۇشىن Ⅱدارەجەلى «دوستىق» وردەنىن تاپسىردى.
