نازاربايەۆ ۋنيۆەرسيتەتىنىڭ ستۋدەنتتەرى استانا ماڭىنان «جاسىل» اۋىل تۇرعىزباق

استانا. قازاقپارات - جاستار ۇسىنعان «جاسىل» اۋىل. مۇندا ەلەكتر قۋاتى سۋدان، جەلدەن جانە كۇننەن الىنادى.

ياعني بارلىعى «جاسىل» تەحنولوگياعا نەگىزدەلگەن. ال حالىق تەك سۇزگىدەن وتكەن سۋ ءىشىپ، تازا اۋامەن تىنىستايدى. تاعى ءبىر ەرەكشەلىگى - بۇل جاسىل مەكەندە جول قيىلىسى بولمايدى. ارا ۇياسى ىسپەتتەس تۇرعىزىلادى. وسىلاي جول-كولىك وقيعالارىن بولدىرماۋ كوزدەلەدى. ازىرگە بۇل تەك جوبا عانا.

ەگەر قولداۋ بولسا، نازاربايەۆ ۋنيۆەرسيتەتىنىڭ ستۋدەنتتەرى استانا ماڭىنان 1 مىڭ ءتۇتىنى بار «جاسىل» اۋىل تۇرعىزۋعا دايىن. ءبىر جىل بويى جاسالعان ىلكىمدى جوبا بۇگىن كوپشىلىككە تانىستىرىلدى.

ستۋدەنتتەردىڭ ەسەبى بويىنشا ەكواۋىل تۇرعىزۋعا 8 ميلليارد تەنگە قاجەت.

دانيار جۇرگەنوۆ، نازاربايەۆ ۋنيۆەرسيتەتىنىڭ ستۋدەنتى:

- ءبىز ستۋدەنتتەرمەن بىرگە تەك قانا وقىپ-جازعان ەمەسپىز. اۋىلعا سالىناتىن جەرگە بارىپ، سول جاقتا قۇمنىڭ، سۋدىڭ اناليزىن الىپ، ولاردى لابوراتوريادا زەرتتەگەنبىز. سالىناتىن جەرى استانانىڭ ماڭىندا 24 شاقىرىم جەردە قابانباي باتىر دەگەن اۋىل بار، سونىڭ جانىندا سالىنادى دەپ ويلايمىز.

www.24.kz