21:56, 13 - مامىر 2016 | GMT +5
گ. گولوۆكين: ەلىمىز ريوداعى دودادا ءبىزدىڭ بوكسشىلاردان التىن مەدالدار كۇتۋگە قۇقىلى
استانا. قازاقپارات - ورتا سالماقتاعى WBA/IBF/IBO نۇسقالارى بويىنشا الەم چەمپيونى گەننادي گولوۆكين ريو-دە-جانەيروداعى وليمپياداعا باراتىن قازاقستان بوكسشىلارىنا ساتتىلىك تىلەپ، ەلىمىز سپورتشىلارى بارىنشا كوبىرەك التىن مەدال الاتىنىنا سەنىم ارتتى.
«قازاقستاندا بۇگىندە بوكسپەن اينالىسۋ ءۇشىن الەم بويىنشا ۇزدىك جاعدايلار جاسالعان. قازاقستاندىق بوكس باسشىلىعىنىڭ وسىنداي قولداۋى اياسىندا بۇل جولدامالاردى يەلەنە الماۋ ۇيات بولار ەدى. وسى رەتتە قازاقستان حالقى بوكسشىلارىمىزدان التىن مەدالداردى كۇتۋگە قۇقىلى. قازاقستان قۇراماسىنا ساتتىلىك تىلەيمىن. بۇل وليمپيادا ويىندارىندا ءبىزدىڭ تۋ كوپ رەت كورىلەدى جانە ءانۇرانىمىز بارىنشا كوبىرەك شىرقالادى دەپ كۇتەمىن»، - دەدى گ. گولوۆكين.
ەستەرىڭىزگە سالا كەتەيىك، بيىل جازعى وليمپيادا ريو-دە-جانەيرودا 2016-جىلعى 5-21- تامىز ارالىعىندا وتەدى. وندا 33 سپورت تۇرىنەن 301 مەدال جيىنتىعى ساراپقا سالىنادى.
اۆتور: رۋسلان عابباسوۆ
