پۋتيننىڭ بۇرىنعى سەرىگىنىڭ اكتيۆى بۇعاۋلانادى

استانا. قازاقپارات - رەسەي لوندون سوتىنىڭ قۋعىنداعى رەسەيلىك ميللياردەر سەرگەي پۋگاچيەۆتىڭ اكتيۆتەرىن، ونىڭ ىشىندە فرانسيانىڭ ريۆەرا قالاسىنداعى قىمبات ياحتاسى مەن جىلجىمايتىن مۇلىكتەرىن ارەستكە الۋ تۋرالى شەشىمىن العانىن حابارلادى.

بۇل تۋرالى «ازاتتىق» حابارلايدى.

رەسەي بانكروت ىستەرى جونىندەگى اگەنتتىگىنىڭ مالىمەتىنشە، پۋگاچيەۆتىڭ بۇعان قوسا نيتستسەدەگى قامالى مەن فرانسۋز الپىسىندەگى شاعىن ءۇي-جايى دا ارەستكە الىنعان.

سەرگەي پۋگاچيەۆ ءبىر كەزدەرى كرەملمەن تىم جاقىن بايلانىستا بولعاندىقتان «پۋتيننىڭ بانكيرى» دەگەن اتپەن بەلگىلى بولعان.

ول كەمە جاساۋ ونەركاسىبى مەن بانك سالاسىندا بيزنەس جاساپ، رەسەيدەگى ەڭ باي ادامداردىڭ ءبىرى بولعان. رەسەي فەدەراتسيا كەڭەسىنە تۋۆا وبلىسىنان سايلانعان بۇرىنعى سەناتور پۋگاچيەۆ 2011-جىلى پرەزيدەنت ۆلاديمير پۋتيننىڭ قۋدالاۋىنا ۇشىراعان سوڭ ۇلى بريتانياعا كەتىپ قالعان.

فرانسيادا قۋعىندا جۇرگەندە ول ماسكەۋمەن سوتتاسىپ، وتكەن جىلى گااگاداعى اربيترلىق سوتقا رەسەي ۇكىمەتىنەن «بيزنەسىن تارتىپ العانى ءۇشىن» وتەماقى رەتىندە 12 ميلليارد دوللار تولەۋدى تالاپ ەتىپ شاعىم تۇسىرگەن.

رەسەي بۇعان جاۋاپ رەتىندە پۋگاچيەۆتى الاياقتىق جاسادى جانە قارجى جىمقىردى دەپ ايىپتاپ، حالىقارالىق ىزدەۋ جاريالاپ، سىرتتاي ەكى جىلعا سوتتاعان.

پۋگاچيەۆ وزىنە تاعىلعان ايىپتاردى تەرىستەيدى. ءبىراق سوت ونىڭ اكتيۆتەرىن رەسەيدىڭ وعان قارسى شاعىمدارىنا بايلانىستى بۇعاۋلاعان.