ءاليا نازاربايەۆانىڭ «جاندانۋ الەمى» قورى تالانتتى بالالاردى ىزدەۋ ءۇشىن بۇكىل قازاقستاندى ارالاماق

 الماتى. قازاقپارات - قازاقستاندا بالالارعا ارنالعان كاسىبي ءان بايقاۋى باستالادى. ۇلتتىق بايقاۋعا كەز- كەلگەن بالا قاتىسا الادى.

 قازاقستان تاۋەلسىزدىگىنىڭ 25 جىلدىعىنا ارنالعان جوبانىڭ اۆتورى ءاليا نازاربايەۆانىڭ «جاندانۋ الەمى» قورى تالانتتى بالالاردى ىزدەۋ ءۇشىن بۇكىل قازاقستاندى ارالاماق.

«جاندانۋ الەمى» قورىنىڭ باسقارما ءتوراعاسى مۇرات يساحانوۆتىڭ ايتۋىنشا، ۇيىمداستىرۋشىلار 3 ماقساتتى كوزدەپ وتىر.

 «ەڭ الدىمەن ءبىزدىڭ ەلىمىزدە تۇراتىن حالىقتاردىڭ تىلدەرىندە جاڭا بالالار اندەرىن شىعارۋ، ولاردى كەڭىنەن تاراتۋ ارقىلى بالالاردىڭ مۋزىكالىق شىعارماشىلدىعىن دامىتۋ، سونىمەن قاتار ءبىلىم بەرۋ ۇيىمىنىڭ پەداگوگتارىنا ادىستەمەلىك كومەك كورسەتۋ كوزدەلىپ وتىر»، - دەدى م. يساحانوۆ.

ۇلتتىق بايقاۋ 5 كەزەڭنەن تۇرادى. ەرتەڭ قازاق ەستراداسى جۇلدىزدارىنىڭ قاتىسۋىمەن رەسپۋبليكا سارايىندا گالا كونسەرت وتەدى.

 ونان سوڭ 23 - مامىر مەن 10 -تامىز ارالىعىندا بەلگىلى مۋزىكالىق پروديۋسەرلەردەن، كومپوزيتورلار مەن تانىمال ورىنداۋشىلاردان تۇراتىن «جاندانۋ الەمى» قورىنىڭ شىعارماشىلىق ۇجىمى 7 جاس پەن 13 جاس ارالىعىنداعى بالالاردىڭ اراسىندا كاستينگ وتكىزۋ ءۇشىن رەسپۋبليكانىڭ بارلىق دەرلىك وبلىس ورتالىقتارىنا، سونىمەن قاتار استانا مەن الماتى قالالارىنا بارادى. العاشقى بولىپ جامبىل وبلىسىنىڭ بالالارى تىڭداۋدان وتەدى.

 تىڭداۋعا كەلگەن ءاربىر بالا ەستەلىك سىيلىقتار الىپ، بايقاۋدىڭ ۇيىمداستىرۋشىلارىنان ديپلومدارمەن ماراپاتتالادى. ۇيىمداستىرۋشىلار جوبانىڭ الەۋمەتتىك جاعىنا ەرەكشە نازار اۋداردى. قازاقستاننىڭ ەڭبەك سىڭىرگەن قايراتكەرى، حالىقارالىق بايقاۋلاردىڭ لاۋرەاتى، پروفەسسور جانە ت. جۇرگەنوۆ اتىنداعى قازاق ۇلتتىق ونەر اكادەمياسىنىڭ «مۋزىكالىق ونەر» فاكۋلتەتىنىڭ دەكانى، وپەرالىق جانە ەسترادالىق ءانشى تولقىن ءزابيروۆا مۋزىكا مەن ءان ءپانىنىڭ مۇعالىمدەرىنە ارناپ CD- تاسىمالداۋشىدا شەبەرلىك ساباعىن ازىرلەدى.

15 - تامىز بەن 30 - تامىز ارالىعىندا ءاربىر وبلىستان جۇزدەن جۇيرىك وزىپ شىققان ەڭ ۇزدىك بالالار «بوبەك» ۇلتتىق ورتالىعىندا ءوز ەسىگىن ايقارا اشاتىن «بالا داۋىسى» جازعى مۋزىكا مەكتەبىندە ءتالىم الادى. بۇل جەردە بالالار سولفەدجيو، حورەوگرافيا، ارتىستىك شەبەرلىك سياقتى باعىتتار بويىنشا ءبىلىم الادى. ءاربىر جارتىلاي فينالعا قاتىسۋشىعا اۆتورلىق بالالار ءانى جازىلىپ، فينالدىق كونسەرتتە ورىندالادى.

ايتا كەتۋ كەرەك، «جاندانۋ الەمى» قورىنىڭ باسقارما ءتوراعاسى مۇرات يساحانوۆتىڭ ايتۋىنشا، بۇل الەۋمەتتىك جوبا بولىپ تابىلادى.

«بالالاردىڭ جازعى مەكتەپكە كەلۋى، ءتالىم الۋى بارلىعى قوردىڭ قارجىسىنان جۇزەگە اسادى. ءبىزدىڭ ماقسات قازاقستاندا ساپالى بالالار ونەرىن قالىپتاستىرۋ»، - دەدى ول.

15 - تامىز بەن 15 - قازان ارالىعىندا كتك تەلەارناسى «بالا داۋىسىنىڭ» كۇندەلىكتەرىن كورسەتەدى.

27 - قازان مەن 28 - قازان ارالىعىندا استانادا «بالا داۋىسى» 1 - ۇلتتىق بالالار ءان بايقاۋىنىڭ فينالى وتەدى. ەل تۇرعىندارى سۇيىكتى وتانىمىز تۋرالى، بالالىق شاقتىڭ شۋاققا تولى الەمى تۋرالى 16 جاڭا ءاننىڭ تۋىلۋىنا كۋاگەر بولادى. سونىمەن قاتار بالالار تانىمال ورىنداۋشىلارمەن دۋەتتە قازاقستاندىق ەسترادانىڭ رەترو- شلياگەرلەرىن ورىندايدى. «بالا داۋىسى» بايقاۋىنىڭ جەڭىمپازىن قازىلار القاسى مەن كوپشىلىك تاڭدايدى.

فينالعا شىققان بارلىق 16 ورىنداۋشى ارنايى سىيلىقتارمەن ماراپاتتالسا، ال ەڭ ۇزدىك ورىنداۋشى ەلىمىزدىڭ ەڭ تانىمال مۋزىكالىق مەكتەپتەرىنىڭ بىرىندە وقۋ گرانتى مەن تانىمال وتاندىق تەلەارنالاردا مۋزىكالىق كليپتىڭ روتاتسياسى قۇقىعىنا يە بولادى.

«بالا داۋىسى» 1- ۇلتتىق بالالار ءان بايقاۋىنىڭ قورىتىندىسى بويىنشا ءاليا نازاربايەۆانىڭ «جاندانۋ الەمى» قورى قازاقستان رەسپۋبليكاسىنىڭ تۇڭعىش پرەزيدەنتى- ەلباسىنىڭ قورىمەن بىرگە ەلىمىزدىڭ بالا باقشالارى مەن مەكتەپتەرىنە جاڭا بالالار ءانى جيناقتارىن تەگىن سىيعا تارتادى.