الماتىدا «پاكىستاننىڭ ساۋدا كەرۋەنى» كورمەسى اشىلدى - فوتو

الماتى. قازاقپارات - بۇگىن الماتىداعى «ريكسوس» قوناقۇيىندە ەلىمىز بويىنشا تۇڭعىش رەت «پاكىستاننىڭ ساۋدا كەرۋەنى» اتتى كورمە اشىلدى. ول ءۇش كۇنگە سوزىلادى.

كورمەنىڭ اشىلۋ ءراسىمى الدىندا وتكەن باسپا ءسوز ءماسليحاتى بارىسىندا پاكىستاننىڭ قازاقستانداعى ەلشىسى ابدۋل ساليك حان بۇل كورمە ەكى ەل اراسىندا مىقتى ساۋدا- ەكونوميكالىق قارىم- قاتىناستىڭ دامۋىنا داڭعىل جول اشاتىندىعىن اتاپ كورسەتتى.

«پاكىستاننىڭ ساۋدا كەرۋەنى» - قازاقستان مەن پاكىستاننىڭ ساۋدا- ەكونوميكالىق قارىم- قاتىناسى تاريحىنداعى تۇڭعىش ساۋدا كورمەسى. پاكىستاننىڭ پرەمەر- ءمينيسترى ناۆاز ءشاريفتىڭ 2015 -جىلى قازاقستانعا جاساعان ساپارى بارىسىندا ەكى ەل اراسىندا ەكونوميكالىق ىنتىماقتاستىقتى ىنتالاندىرۋ ماقساتىندا بىرنەشە كەلىسىمدەرگە قول قويىلعان ەدى. بۇل كورمە سول كەلىسسوزدەردىڭ ناتيجەسى. پاكىستان - ەۋرازيا قۇرلىعىنىڭ ورتالىق ايماعى مەن وڭتۇستىك ازيا ءوڭىرى ارالىعىندا جاتقان ەل. سوندىقتان ءبىز پاكىستاننىڭ تانىمال تاۋارلارىمەن قاتار، ەكى ءوڭىردى جالعايتىن ماڭىزدى قۇرلىق جولدارىن پايدالانۋ، سونداي- اق، ءوزارا ءتيىمدى ساۋدا بايلانىستارىن ورناتۋ مۇمكىندىكتەرىن ۇسىنامىز»، - دەدى ەلشى.

«پاكىستاننىڭ ساۋدا كەرۋەنى» كورمەسى «جاڭالىقتارعا تولى ساياحات» دەگەن ۇرانمەن وتەدى. ول پاكىستاندى جاڭا قىرىنان اشا تۇسۋگە باعىتتالعان. كورمەدە قازاقستانعا قاجەتتى توقىما جانە بىلعارى ونىمدەرى، فارماتسيەۆتيكالىق ءدارى- دارمەكتەر مەن مەديتسينالىق قۇرال-جابدىقتار، جيھاز جانە قولونەر بۇيىمدارى، ازىق- تۇلىك جانە اۋىل- شارۋاشىلىعى ونىمدەرى ۇسىنىلادى. كورمەنىڭ ءبىرىنشى جانە ەكىنشى كۇنىندە 50 پاكىستاندىق كومپانيا قازاقستاندىق كومپانيالارمەن بايلانىس ورناتۋ ماقساتىندا ءوز ونىمدەرىمەن تانىستىرادى. سونىمەن قاتار، كورمەنىڭ ەكىنشى كۇنى كەشكى ساعات 18.30-دا МEGA Alma-Ata ساۋدا ويىن-ساۋىق ورتالىعىندا پاكىستاننىڭ ەڭ تانىمال ديزاينەرلەرىنىڭ ءسان كورسەتىلىمى بولادى.

     

اۆتور: ايبوتا جاپپاربەرگەن