وتاندىق عالىمدار تاپقان ءدارى دەنەدەگى سىنىق پەن كۇيىكتى تەز جازادى

استانا. قازاقپارات - نازاربايەۆ ۋنيۆەرسيتەتتىڭ عالىمدارى مەديتسينا سالاسى ءۇشىن ۇلكەن جەتىستىك بولاتىن ءدارى ويلاپ تاپتى. ونىڭ ءبىرى - «اقىلدى» پوليمەر. ول سىنعان سۇيەكتىڭ جازىلۋىن جەدەلدەتەدى.

 ال ەكىنشى ءونىم - «اقىلدى» تاڭعىش. بۇل ءونىمدى كۇيىك شالعاندا جانە ويىق جارا پايدا بولعاندا پايدالانۋعا بولادى، دەپ جازادى «ەگەمەن قازاقستان» گازەتى بۇگىنگى سانىندا.

 - ءبىز ادام سۇيەگى سىنعان كەزدە جازىلۋدى تەزدەتەتىن جۇيەگە قول جەتكىزدىك. ءبىزدىڭ عالىمدار پيتتسبۋرگ ۋنيۆەرسيتەتىمەن بىرىگىپ، ادام اعزاسىنداعى دىڭگەك جانە سۇيەك جاسۋشالارىن بىرىكتىرەتىن ءدارى ويلاپ تاپتى. زەرتتەۋ جۇمىستارىنىڭ ناتيجەسىندە وسى پوليمەردى قولدانعاننان كەيىن سىنعان سۇيەكتىڭ جازىلۋ جىلدامدىعى 30 پايىزعا ارتقان. قازىرگى تاڭدا ءبىز كلينيكالىق زەرتتەۋ الدى ساتىسىندا تۇرمىز. الداعى ۋاقىتتا ءبىز جاساعان «اقىلدى» پوليمەردىڭ قانشالىقتى دەڭگەيدە قاۋىپسىز ەكەنىن انىقتاۋىمىز قاجەت. ەگەر جۇمىسىمىز ءساتتى شىقسا، عالىمدار كلينيكالىق زەرتتەۋدى باستايدى، - دەيدى نازاربايەۆ ۋنيۆەرسيتەتتىڭ بيوينجەنەريا جانە رەگەنەراتسيالىق مەديتسينا زەرتحاناسىنىڭ عىلىمي جەتەكشىسى شولپان اسقاروۆا. ول سونداي- اق وتاندىق عالىمداردىڭ بۇل جەتىستىكپەن شەكتەلىپ قالماي، جاڭا مەديتسينالىق ءونىمدى قۇراستىرىپ جاتقانىن دا ايتتى.

- ءارى ءبىز «اقىلدى» تاڭعىشتى ازىرلەپ جاتىرمىز. بۇل تاڭعىش گەلدەن جاسالادى. اتالعان زات سۇيىق كۇيدە بولادى. ول تەرىگە جاعىلعان كەزدە قاتىپ قالادى. بۇل ءادىس كۇيىك شالعان كەزدە جانە ويىق جارانى ەمدەۋگە (يازۆا) پايدالانىلادى. عالىمدار جاساعان ءونىم قازىرگى تاڭدا كلينيكالىق زەرتتەۋالدى ساتىسىندا تۇر. الداعى جىلدارى بۇل ونىمدەردى قازاقستاندا شىعارۋدى جوسپارلاپ وتىرمىز، - دەيدى ول.

ايتا كەتەيىك، نازاربايەۆ ۋنيۆەرسيتەتتە National Laboratory Astana-نىڭ باستاۋىمەن «رەگەنەراتيۆتى مەديتسينا جانە ساپالى ۇزاق ءومىر ءسۇرۋ» اتتى IV حالىقارالىق عىلىمي كونفەرەنتسيا وتكەن- ءدى. ال وتاندىق عالىمداردىڭ يننوۆاتسيالىق جەتىستىكتەرى وسى شارادا كەڭىنەن ايتىلدى.