قىمىزدان جاسالعان بالمۇزداققا سۇرانىس جوعارى - پاۆلودار
بيزنەس فورۋمعا قاتىسقان ايماق باسشىسى بولات باقاۋوۆ جوبا اۆتورلارىمەن تىلدەسىپ، شيپالى سۋسىننان جاسالعان ونىمنەن ءدام تاتتى، دەپ حابارلايدى pavlodarnews.
جەرگىلىكتى ينۆەستورلار قاتىسقان ستارتاپ اكادەميادا بارلىعى 15 جوبا ۇسىنىلدى. سولاردىڭ ءبىرى - قىمىزدان جاسالعان بالمۇزداق «KoumIce» جوباسى. يدەيا اۆتورلارى اسحات ايتجانوۆ پەن نۋرگيزا كالينوۆانىڭ ايتۋلارىنشا، تاۋار تازا تابيعي ونىمنەن تۇرادى.
«بۇگىندە بالمۇزداقتىڭ ءتاتتى جانە اشى تۇرلەرىن ازىرلەپ شىعاردىق. بىزگە ۋنيۆەرسيتەت باسشىلىعى زەرتحانادان ورىن ۇسىنىپ، جوبامىزدىڭ جۇزەگە اسۋىنا كومەكتەستى. بالمۇزداق الەۋمەتتىك جەلىلەر ارقىلى ساتىلۋدا. جوبا قۇنىن ءۇش ميلليون تەڭگەگە باعالاپ وتىرمىز. 1,5 ميلليون تەڭگەگە ارنايى قۇرىلعى، 800 مىڭ تەڭگەگە شيكىزات الىنادى. ال، قالعان 700 مىڭ تەڭگە تەحنولوگيامەن جۇمىس جاساۋعا جۇمسالادى. جالپى، وسى ءىس ارقىلى 20 شاقتى جۇمىس ورنىن اشۋدى كوزدەپ وتىرمىز. جوبانىڭ شىعىنىن وتەۋ توعىز اي، ىسكە اسىرىلۋى ءبىر اي ۋاقىتتى الادى»، - دەيدى ستۋدەنتتەر.
ايتا كەتەرلىگى، ءبىر ايدىڭ ىشىندە اۆتورلار ءونىمدى كولەمىنە قاراي 150-900 تەڭگەدەن قالاداعى دۇكەندەرگە تاسىمالداۋدى جوسپارلاۋدا. ول ءۇشىن قاجەتتى سەرتيفيكاتتارى دا بار.
