الماتىدا ەسترادا جۇلدىزدارى مەن ب ا ق وكىلدەرى اراسىندا فۋتبول ماتچى وتكىزىلدى

الماتى. قازاقپارات- بۇگىن الماتىدا فۋتبولدان بۇقارالىق اقپارات قۇرالدارى كومانداسى مەن ەسترادا جۇلدىزدارى اراسىندا جولداستىق كەزدەسۋ وتكىزىلدى.

بۇل شارا ج ق ت ق (س پ ي د) دەرتىنەن كوز جۇمعانداردى ەسكە الۋ كۇنىنە ارنالدى. بۇل كۇن مامىر ايىنىڭ ءۇشىنشى جەكسەنبىسى كۇنى اتاپ وتىلەتىنى بەلگىلى.

«قازاقستاندا بۇگىنگى تاڭدا ا ي ت ۆ (ادامنىڭ يممۋن تاپشىلىعى ۆيرۋسى) ىندەتىن الدىن الۋ جانە دۇرىس دياگنوز قويۋعا باعىتتالعان كەشەندى شارالار جۇزەگە اسىرىلىپ جاتىر. قازاقستان ورتالىق ازيادا ا ي ت ۆ ىندەتىن جۇقتىرعانداردى تەگىن ەمدەۋدى قامتاماسىز ەتەتىن جالعىز مەملەكەت. سونىڭ ارقاسىندا ءبىزدىڭ ەل ايتۆ ىندەتىنىڭ تارالۋ دەڭگەيى ەڭ تومەن ەلدەر توبىنا ەندى» ، - دەدى ءوز سوزىندە رەسپۋبليكالىق ج ق ت ق ورتالىعى باس ديرەكتورىنىڭ ورىنباسارى يرينا پەترەنكو.

ونىڭ ايتۋىنشا، شارانى ۇيىمداستىرۋداعى باستى ماقسات - قوعام نازارىن وسى سالادا ورىن الىپ جاتقان كەمسىتۋشىلىك ارەكەتتەرگە اۋدارۋ.

«بۇگىندە قازاقستاندا وسى ىندەتكە شالدىققان 17 مىڭنان استام ادام ءومىر سۇرەدى. ولار قوعامنىڭ ايىپتاۋىنان قورقىپ، كومەككە جۇگىنبەيدى. ال ادامدار بۇل ىندەتتىڭ الدىن الۋ، ەمدەۋ، بەرىلۋ جولدارىن بىلۋلەرى ءتيىس. وسى ىندەتتى جۇقتىرعانداردان قورىقپاۋلارى كەرەك. مىسالى، ايتۆ ىندەتىن جۇقتىرعان ايەلدەر دۇرىس ەمدەلسە، بالا ءسۇيۋ مۇمكىندىگىنە يە ەكەندىكتەرىن ەكىنىڭ ءبىرى بىلە بەرمەيدى»، - دەدى ي. پەترەنكو.

ماتچ جولداستىق سيپاتتا بولعانىمەن تارتىستى ءوتتى. ويىن قورىتىندىسى بويىنشا ب ا ق وكىلدەرى 3:2 ەسەبىمەن جەڭىسكە جەتتى.

جۇلدىزدار كومانداسىندا ءانشى ابدۇلكارىم كارىموۆ، تەلە جۇرگىزۋشى دانيار ماقاشەۆ، «ورىstar» جوباسىنىڭ قاتىسۋشىسى ەۆگەني شۆورنەۆ جانە باسقالار ونەر كورسەتتى.

جەڭىمپازدارعا كۋبوكتى جانە قاتىسۋشىلارعا جۇلدەلەردى قازاقستاننىڭ فۋتبول فەدەراتسياسىنىڭ ۆيتسە-پرەزيدەنتى سەيىلدا بايشاقوۆ تاپسىردى.

بۇگىنگى شارانى الماتى قالاسىنىڭ جاستار ساياساتى مەملەكەتتىك قورى، USAID جوباسى، قازاقستاننىڭ ا ي ت ۆ ىندەتىمەن ءومىر سۇرۋشىلەر وداعى ۇيىمداستىردى.

اۆتور: ايبوتا جاپپاربەرگەن