قازاقستاندا كوش باستاپ تۇرعان «داۋىس» جوباسى بيىل ەرەكشە وتپەك

استانا. قازاقپارات - الەمنىڭ ونداعان ەلىندە تانىلىپ ۇلگەرگەن «داۋىس» جوباسى قازاقستاندا كوش باستاپ تۇر.

بيىلعى جىلى بۇل جوباعا ۇلكەندەر عانا ەمەس، بۇلدىرشىندەر دە قاتىسا الاتىن بولدى.

بۇل تۋرالى kursiv.kz حابارلايدى.

The voice جوباسىنىڭ نەگىزىندە قۇرىلعان «داۋىس. بالالار» جوباسى گوللاندىق پروديۋسەردىڭ قاتىسۋىمەن وتەدى. اتالعان جوبا قىركۇيەك ايىندا ءبىرىنشى ارنادان كورسەتىلەدى. قاتىسام دەۋشىلەر قازىردەن باستاپ ءوتىنىش جازا الادى.

«جوبا ءادىل وتەدى. جەڭىمپازدىڭ كىم بولاتىنىن الدىن الا ەشكىم بىلمەيدى»، - دەيدى جوبا جەتەكشىسى يسمايل يگيلمانوۆ.

العاشقى ىرىكتەۋدەن كەيىن، ءادىلقازىلار قاتىسۋشىنى ءتۇر-تۇلعاسىن كورمەي تاڭدايدى. جوبادا نۇرلان ابدۋللين، ءالي وقاپوۆ، ەۆا بەحەر تالىمگەر بولماق. ال، ءتورتىنشىسىنىڭ كىم ەكەنى ازىرگە جۇمباق.

شوۋدىڭ جەڭىمپازىن كورەرمەندەردىڭ داۋىس بەرگەن س م س- حابارلاماسى ارقىلى انىقتايدى. جەڭىمپازدىڭ كىم ەكەنىن 2017-جىلدىڭ قاڭتار ايىندا حابارلايتىن بولادى. «داۋىس» جەڭىمپازى 7 ميلليون تەڭگە، ال «داۋىس. بالالار» جەڭىمپازى 3 ميلليون تەڭگەنى قانجىعاسىنا بايلاماق.

بۇدان بولەك قاتىسۋشىلار اۆتورلىق ءانىن ورىنداپ، فورتەپيانو، سكريپكا سىندى مۋزىكالىق اسپاپتاردا ويناپ، ءاندى قاتار ورىنداي الادى. ءتىپتى، ىدىسقا سۋ قۇيىپ ونەر كورسەتۋىنە دە بولادى.

ال، فونوگرامما مەن مينسوۆكالار مۇلدە قولدانىلمايدى. اقتىق سىندا قاتىسۋشىلار وركەسترمەن بىرگە ءان ايتاتىن بولادى.

«داۋىس» جوباسىنىڭ وزگەلەردەن ايىرماشىلىعى - ءادىلقازىلار قاتال بولمايدى. تەك ءوز كومانداسىن قۇراتىن تالىمگەرلەر عانا بولادى. سىن ايتىلمايدى، ەشكىمدى كەلەمەجدەپ كۇلمەيدى. قاتىسۋشىنىڭ ءتۇر-كەلبەتى قانداي بولماسىن، ونىڭ تەك داۋسى، ونەرى باعالانادى.